თბილისის საქალაქო სასამართლოში ერეკლე კოდუას სასამართლო პროცესი გაიმართა. მოსამართლემ დაცვის მხარის შუამდგომლობა არ დააკმაყოფილა, რომელიც პროკურატურის ერთერთი მთავარი მოწმის ლევან კალანდაძის წერილობითი განცხადების დაუშვებლად ცნობას ითხოვდა.

დაცვის მხარემ განმარტა, რომ გარდაცვლილი მოწმის განცხადება გაყალბებულია და ორიგინალი ვერსია არ არსებობს. მოსამართლემ კალანდაძის ჩვენება დასაშვებად ცნო.

ერეკლე კოდუას გამოძიება სამსახურეობრივი უფლებამოსილების ბოროტად გამოყენებასა და სხვისი ქონების თაღლითური გზებით მითვისებას ედავება.

„კანონმდებლობა მტკიცებულების ძალას არ ანიჭებს დოკუმენტს, რომლის ავთენტიკურობაც არ დასტურდება, მოსამართლეს უნდა მიეღო ერთადერთი გადაწყვეტილება და დაუშვებლად უნდა ეცნო ეს მტკიცებულება, ძალიან თვალნათელია, რომ ეს დოკუმენტი პროკურატურაშია შედგენილი, მას ორიგინალი ხელმოწერა არ აქვს. ოფიციალურ სისხლის სამართლის საქმეში ოფიციალური დოკუმენტი არ არსებობს და ასლების საფუძველზე მიმდინარეობს სისხლის სამართლის საქმეების წარმოება“, - განაცხადა კოდუას ადვოკატმა ოთარ კახიძემ.

მიმდინარე სასამართლო პროცესზე კომენტარი კოდუას მეუღლემ, ჟურნალისტმა ნანუკა ჟორჟოლიანმაც გააკეთა:

„ამ საქმეში ჰყავთ ორი მთავარი მოწმე, ერთი მთავარი მოწმის განცხადების ორიგინალი არ არსებობს, მეორე მთავარი მოწმე ამბობს, რომ „დაბოლილი“ ანუ მარეხუანას ზემოქმდების ქვეშ მიდიოდა ფილარმონიასთან, ის გააჩერა სოდ-მა, არ დააკავა და გადაუფორმა ძალიან ძვირადღირებული ავტომობილი. ანუ სოდ-მა მარეხუანას ზემოქმედების ქვეშ მყოფ პიროვნებას ჩაუდო ჯიპი“, - განაცხადა ნანუკა ჟორჟოლიანმა.