მოლდოვა რუსი სამშვიდობოების დნესტრისპირეთიდან სწრაფ გაყვანას და მათი საერთაშორისო სამოქალაქო მისიით ჩანაცვლებას ითხოვს. ამის შესახებ გაეროს გენერალური ასამბლეის ტრიბუნიდან მოლდოვის საგარეო საქმეთა მინისტრმა, ნატალია ჰერმანმა განაცხადა. მისი თქმით, რუსი სამხედრო მოსამსახურეების გასვლა დადებითად იმოქმედებს კიშინოვის და ტირასპოლის მოლაპარაკებებზე.

„ჩვენ ვიმედოვნებთ , რომ რუსეთის ფედერაცია ჯარების გაყვანის პროცესს, დაყოვნებების გარეშე წარმართავს. ჩვენ ასევე ვთვლით, რომ სამშვიდობო მოლაპარაკებები და მშვიდობისმყოფელების საერთაშორისო სამოქალაქო მისიით ჩანაცვლება, დადებით მუხტს მისცემს პოლიტიკური პროცესების განვითარებას.“ განაცხადა მოლდოვის საგარეო უწყების ხელმძღვანელმა.

ჰერმანმა ასევე მხარი დაუჭირა მოლაპარაკებების განახლებას დნესტრისპირეთის კრიზისის საკითხზე 5+2 ფორმატით (რუსეთი,უკრაინა,ეუთო,ევროკავშირი,აშშ,-მოლდოვა, დნესტრისპირეთი)

როგორც ნატალია ჰერმანმა განაცხადა, კიშინოვის საბოლოო მიზანი იგივე რჩება: მიაღწიოს პრობლემის პოლიტიკური გზით გადაწყვეტას, რომელიც დაეფუძნება ქვეყნის სუვერენიტეტისა და ტერიტორიული მთლიანობის შენარჩუნებას, რომლის შემადგენლობაშიც დნესტრისპირეთს განსაკუთრებული სტატუსი მიენიჭება.