26 სექტემბრის ღამემ, დონეცკში დაძაბულ ვითარებაში ჩაიარა. აფეთქებების შედეგად დონეცკის აეროპორტში გაითიშა ელექტროენერგია და გაჩნდა ძლიერი ხანძარი.

საბრძოლო მოქმედებები მიმდინარეობდა დონეცკის ორ რაიონში კუბიშევსში და კიევსკიში, ამის შესახებ დონეცკის საქალაქო საბჭო იტყობინება.

დილის 5 საათიდან, რამდენიმე რაიონში ისმოდა აფეთქებების ხმა. ჭურვების მოხვედრის შედეგად, დაზიანდა 20-მდე სახლი.

უკრაინული მედიის ინფორმაციით, მთელი ღამის განმავლობაში, უკრაინის სამთავრობო ძალების პოზიციებზე ტერორისტებმა რამდენიმე შეტევა განახორციელეს.

თავის მხრივ, როგორც ანტიტერორისტული ოპერაციის პრესცენტრი იუწყება, უკრაინის სამთავრობო ძალები სრულად აკონტროლებენ ვითარებას მარიუპოლის რაიონში.

სიტუაცია შედარებით დილის 10 საათისთვის დამშვიდდა . სასიცოცხლოდ მნიშვნელოვანი ობიექტების მუშაობა დონეცკში ჯერჯერობით შეუფერხებლად მიმდინარეობს.