16 წლის გოგონა, რომელიც ნოვოსიბირკში ჯგუფური გაუპატიურების მსხვერპლად იქცა, ინტერნეტში მიმართვას ავრცელებს.

მან მიმართვა სოციალურ ქსელში "ВКонтакте" განათავსა.

ამასთანავე მან განაცხადა, რომ ამ ინფორმაციის გავრცელების შემდეგ ის ქსელში საკუთარ გვერდს გააუქმებდა.

„მეგობრებო, იმისთვის რომ თავიდან ავიცილო ყალბი ინფორმაციის გავრცელება, მინდა შეგატყობინოთ, რომ ყველა ეს არსება უკვე დაჭერილი და დაკითხულია, ახლა ისინი გისოსებს მიღმა იმყოფებიან, სრულწლოვანებს 10 წელზე მეტი, ხოლო არასრულწლოვანებს 10 წლამდე ციხე ელოდებათ.

მინდა გითხრათ, რომ სისხლის ანალიზი გავიკეთე და არავითარი ნარკოტიკი არ აღმომაჩნდა, იმ ადამიანებს , რომლებმაც იციან რა და როგორ მოხდა და არ არიან ბრბოს ნაწილი, როგორც უმრავლესობა, განსაკუთრებული მადლობა მინდა ვუთხრა მხარდაჭერისთვის , ეს გვერდი მალე წაიშლება, ის ბიჭები კი იქნებიან ციხეში.“- წერს ძალადობის მსხვერპლი გოგონა.

შეგახსენებთ, შემთხვევა რამდენიმე დღის წინ რუსეთის ქალაქ ნოვოსიბირსკში მოხდა. რუსული მედიის ინფორმაციით, 16 წლის გოგონა ახალგაზრდების ჯგუფმა გააუპატიურა, შემდეგ კი მოძალადეებმა გოგონას შიშველი ფოტოები ინტერნეტში გამოაქვეყნეს.

როგორც რუსული მედია იუწყება, გოგონას მეგობარმა ბიჭმა სწორედ ასე გადაწყვიტა მასზე შურისძიება მას შემდეგ, რაც მისსავე მეგობართან ოთახში განმარტოებულს შეუსწრო. მოძალადეებმა გაუპატიურების დროს ბოთლები და სანთებელა გამოიყენეს.

მოძალადეების ნაწილი უკვე დაკავებულია, დანარჩენების მიმართაც სამძებრო სამუშაოები მიმდინარეობს.

გოგონა სამედიცინო ცენტრში რეაბილიტაციის კურსს გადის, ის უკვე დაკითხეს გამომძიებლებმა.

ერთ-ერთი ვერსიით, წვეულებაზე არასრულწლოვანებმა ალკოჰოლთან ერთად ნარკოტიკული ნივთიერებებიც მიიღეს, რაც მათი არაადეკვატური ქცევის მიზეზი გახდა.

ვრცელდება ინფორმაცია, რომ მოძალადებს შორის ერთ-ერთი ტაიკვანდოში ევროპის ჩემპიონატის ვერცხლის პრიზიორია, ის მართლსაწინააღმდეგო ქმედებებში ადრეც იყო შემჩნეული.