პეტრო პოროშენკომ, უკრაინის ევროკავშირის წევრობაზე განაცხადის შეტანის თარიღი დაასახელა. უკრაინის პრეზიდენტის თქმით, ეს 2020 წელს მოხდება. ამის შესახებ პოროშენკომ კიევში გამართულ საგანგებო პრესკონფერენციაზე განაცხადა, სადაც მის მიერ შემუშავებული რეფორმების პროგრამა „სტრატეგია 2020“ წარადგინა.

პროგრამა მომდევნო 6 წლის მანძილზე, ევროკავშირთან უფრო მეტად დასაახლოვებლად, 60 რეფორმის გატარებას ითვალისწინებს.

პოროშენკოს თქმით, რეფორმების ლოზუნგი იქნება „ ღირსება, თავისუფლება, მომავალი“. ხოლო ძირითადი ვექტორები- განვითარება, უსაფრთხოება, პასუხისმგებლობა და სიამაყე.

უკრაინის პრეზიდენტმა გამოყო პრიორიტეტული რეფორმები, რომელთა გამნხორციელებაც, მისი თქმით უკრაინისთვის სასიცოცხლოდ მნიშვნელოვანია. ეს რეფორმებია:

ხელისუფლების განახლება და ანტიკორუფციული რეფორმები.

სასამართლო რეფორმა.

სამართალდამცავი ორგანოების რეფორმა.

ეროვნული უსაფრთხოების და თავდაცვის ორგანოების რეფორმა.

დეცენტრალიზაცია და საჯარო სამსახურის რეფორმა.

ბიზნესის ხელშეწყობის და განვიტარების რეფორმა.

ჯანდაცვის სისტემის რეფორმა.

საგადასახადო რეფორმა.

პოროშენკომ ძირითად რეფორმებს შორის უმნიშვნელოვანესად, სასამართლო სისტემის რეფორმირება დაასახელა.