„ყველა სახელმწიფო, დიდიც და პატარაც პასუხისმგებლობით უნდა მოეკიდოს და უზრუნველყოს საერთაშორისო ნორმების შესრულება“- ამის შესახებ აშშ-ს პრეზიდენტმა ბარაკ ობამამ გაეროს გენერალურ ასამბლეაზე გამოსვლისას განაცხადა.

ობამას განცხადებით, დიდ სახელმწიფოებს არ აქვთ უფლება, საფრთხე შეუქმნან სხვა სახელმწიფოებს.

„ამერიკა და ჩვენი მოკავშირეები მხარს დავუჭერთ უკრაინას დემოკრატიის და ეკონომიკის განვითარებაში, ჩვენ გავაძლიერებთ ჩვენს მეკავშირეებს და გავაძლიერებთ კოლექტიური თავდაცვის სისტემებს. ჩვენ ვაიძულებთ რუსეთს აგრესიისთვის საფასური გადაიხადოს.“-განაცხადა აშშ-ს პრეზიდენტმა

ობამამ აღნიშნა, რომ რუსეთს შეუძლია აირჩიოს მშვიდობის გზა და შეასრულოს ცეცხლის შეწყვეტის შესახებ შეთანხმება.

„თუ რუსეთი აირჩევს მშვიდობის გზას, რომელ გზასაც ის ადგა „ცივი ომის“ დასრულების შემდეგ, ეს თავად რუსეთის მოსახლეობის კეთილდღეობას უზრუნველყოფს, ამ შემთხვევაში ჩვენ გავაუქმებთ ჩვენს სანქციებს და მივესალმებით თანამშრომლობას საერთო გამოწვევების გამკლავების საქმეში. გასულ წლებში რუსეთმა და ამერიკამ შეძლეს ამის გაკეთება. ჩვენ ახლაც მზად ვართ ამისთვის ერთი პირობით, თუ რუსეთი შეიცვლის კურსს“-აღნიშნა ობამამ.