საქართველოს სახალხო დამცველი უჩა ნანუაშვილი საქართველოს მთავარ პროკურატურას, ჟურნალისტ ნათია მიქიაშვილის მიმართ განხორციელებული სავარაუდო მუქარის თაობაზე სწრაფი და ეფექტური საგამოძიებო ღონისძიებების გატარებისკენ მოუწოდებს.

ნანუაშვილის განცხადებით, საჭიროა უზრუნველყოფილი იქნას თავისუფალი და ჟურნალისტური საქმიანობისათვის სათანადო გარემოს შექმნა.

"სახალხო დამცველი ხაზს უსვამს მედიის განსაკუთრებულ როლს თავისუფალი და დემოკრატიულ ღირებულებებზე დამკვიდრებული სახელმწიფოს მშენებლობის პროცესში და მიიჩნევს, რომ ხელისუფლება ვალდებულია გაატაროს შესაბამისი ღონისძიებები, რათა თითოეულ ჟურნალისტს მიეცეს შესაძლებლობა ყოველგვარი ზეწოლის გარეშე განახორციელოს თავისი საქმიანობა.

საქართველოს კონსტიტუციის 24-ე მუხლის თანახმად მასობრივი ინფორმაციის საშუალებები თავისუფალია და დაუშვებელია ცენზურა. საქართველოს სისხლის სამართლის კოდექსის 154-ე მუხლის მიხედვით, დასჯადია ჟურნალისტისათვის პროფესიულ საქმიანობაში ხელის შეშლა და ჩარევა", -ნათქვამია სახალხო დამცელის მიერ გავრცელებულ განცხადებაში.