თუკი უკრაინა ევროკავშირთან ასოცირების შეთანხმების შესრულებას დაიწყებს, რუსეთი მას ბაზარს დაუხურავს, - მედიის ცნობით, ამ შინაარსის მუქარის წერილი, ვლადიმერ პუტინმა პეტრო პოროშენკოს გაუგზავნა.

ტექსტი ”როიტერის” ჟურნალისტებს ჩაუვარდათ ხელში. საგენტო წერს, რომ, როგორც ჩანს, პუტინი უკრაინისა და ევროკავშირის სავაჭრო შეთანხმების შესაძლო ვადაზე ადრე განხორციელებამ შეაშფოთა.

წერილის ტექსტში ნათქვამია, რომ უკრაინას სასიცოცხლოდ მნიშვნელოვან რუსულ ბაზარს მაშინვე დაუხურავენ, როგორც კი სავაჭრო შეთანხმების რომელიმე პუნქტის განხორციელება დაიწყება.

წერილი 17 სექტემბრით თარიღდება. მისი გაგზავნის მეორე დღეს დიმიტრი მედვედევმა ხელი მოაწერა უკრაინული საქონლისთვის გადასახადების დაწესების შესახებ განკარგულებას.