იაპონიის პრემიერ-მინისტრმა სინძო აბემ, პუტინის საკუთარ ქვეყანაში მიწვევა გადაიფიქრა. ვიზიტი, რომელიც მიმდინარე წლის შემოდგომას უნდა შემდგარიყო, ტოკიომ სავარაუდოდ 2015 წლის გაზაფხულისთვის გადადო და შესაძლოა კიდევ უფრო მოგვიანებითაც შედგეს. ამის შესახებ იაპონური მედია იტყობინება.

kyodonews.jp-ის თანახმად ვაშინგტონმა ტოკიოს მოსთხოვა, პუტინის და დასავლეთის დაძაბული ურთიერთობის ფონის გამო, რუსეთის პრეზიდენტის იაპონიაში ვიზიტი დროებით გადაედოთ.

ოფიციალური ტოკიოს განცხადებით კი, ეს გადაწყვეტილება დასავლეთის ქვეყნებისადმი სოლიდარობის ნიშნად მიიღეს, რომლებიც ცდილობენ რუსეთი აიძულონ უკრაინაში აგრესიულ ქმედებებზე უარი თქვას .

ვლადიმერ პუტინის ვიზიტის ახალი თარიღი განისაზღვრება იმისდა მიხედვით, რამდენად დაალაგებს რუსეთი ურთიერთობას აშშ-სთან, რომელიც იაპონიის ერთ-ერთი მთავარი მოკავშირე და პარტნიორია.

აღნიშნულ ვიზიტზე მიწვევა ვლადიმერ პუტინს 2013 წლის აპრილში გაუგზავნეს, 6 თვის შემდეგ კი რუსეთის საგარეო უწყების ხელმძღვანელმა მიწვევაზე თანხმობა დაადასტურა.