იარაღის უკანონოდ ტარება 6 წლამდე თავისუფლების აღკვეთით დაისჯება.

იარაღის შესახებ კანონსა და სისხლის სამართლის კოდექსში შესული ცვლილებები მთავრობის სხდომაზე დღეს დაამტკიცეს.

იარაღის ტარება ნაკლებად მძიმე დანაშაულის ნაცვლად, მძიმე კატეგორიაში შევა. კანონპროექტში შესული ცვლილებების შესახებ იუსტიციის მინისტრმა მთავრობის სხდომის დასრულების შემდეგ ისაუბრა.

„ამ შემთხვევაში სანქცია უქმდება და შემოდის თავისუფლების აღკვეთა არა 3-დან 5 წლამდე არამედ 4-დან 6 წლამდე. წესების დარღვევით იარაღის უკანონო ტარება არ იქნება ნაკლებად მძიმე დანაშაული, ეს იქნება მძიმე დანაშაული და ეს უნდა გაიგონ ჩვენმა ახალგაზრდებმა", - განმარტა თეა წულუკიანმა.

მისი თქმით, ასევე მკაცრდება კანონი იარაღის შენახვაზეც.

„ მნიშვნელოვანი სიახლეა ისიც, რომ სისხლის სამართლის კოდექსის 236-ე მუხლში შედის ცვლილება. ამ მუხლის პირველი ნაწილი, რომელიც ეხება იარაღის უკანონო შეძენა-შენახვას, მკაცრდება და ჯარიმა აღარ იქნება სანქცია. ამიერიდან პირი, რომელიც უკანონოდ შეიძენს ან შეინახავს იარაღს, მაქსიმალურ სასჯელად, სამის მაგივრად, ოთხი წლით თავისუფლების აღკვეთას მიიღებს", - განაცხადა წულუკიანმა.