საქართველოს ფინანსთა სამინისტროს საგამოძიებო სამსახურმა რამდენიმე შპს-ს დამფუძნებლები, მოქალაქეები გივი ბურჯანაძე და ზაზა ბურჯანაძე დააკავა.

ბრალდებულებმა საბაჟო გადასახადისათვის დაწესებული 5 დღიანი საშეღავათო პერიოდის ბოროტად გამოყენება განიზრახეს. მათ ერთმანეთისგან დამოუკიდებლად, 4 სხვადასხვა კომპანია დაარეგისტრირეს და საქართველოში შემოიტანეს 573 121 ლარის ღირებულების ნავთობის მასალა "ბიტუმი", ასევე საკვები პროდუქტი ქიშმიში და ფინიკი. ამ ხერხით პროდუქციის განბაჟების შემდეგ ბრალდებულებმა თავი აარიდეს იმპორტის გადასახადებს, რითაც სახელმწიფო ბიუჯეტს განსაკუთრებით დიდი ოდენობის, 136 566 ლარის ზიანი მიადგა .

გამოძიება გრძელდება სისხლის სამართლის კოდექსის 185-ე მუხლით, რაც თავისუფლების აღკვეთას 4 დან 6 წლამდე ვადით ითვალისწინებს.