რუსთავის #6 დაწესებულებაში მორიგი ინციდენტი მოხდა. 21 წლის ჯემალ ქუთათელაძის ადვოკატი ამტკიცებს, რომ მისი დაცვის ქვეშ მყოფი სასტიკად ნაცემია.

მისი თქმით, მსჯავრდებულს სერიოზული დაზიანებები თავისა და კიდურების არეში აქვს მიყენებული.

ადვოკატი ამბობს, რომ მსჯავრდებული სასჯელაღსრულების #8 დაწესებულებაში გადაყვანამდე, ჯერ კიდევ რუსთავის ციხეში ბადრაგებმა სცემეს.

პატიმრის ოჯახი ვიდეოთვალის ჩანაწერების განსაჯაროებას ითხოვს. მათ აღნიშნულთან დაკავშირებით სახალხო დამცველს უკვე მიმართეს.

"მიზეზი თუ რატომ სცემეს არ იცის მან. ამის დადგენა არ წარმოადგენს სირთულეს, რადგან ისეთ ადგილზე მოხდა ცემის ფაქტი, რომ 4 კამერა დააფიქსირებდა ამას. მან თქვა, რომ რამდენიმე კაცი მირტყამდაო. გვითხრა, რომ მიგვემართა სახალხო დამცველისთვის. ხვალ ჩემზეც რომ გახმაურდეს თავი ჩამოიხრჩოო, ყველამ იცოდეს მე თავს არ ვიკლავ თუ არ მომკლესო", - აცხადებს ადვოპკატი.

როგორც "ნიუპოსტს" სასჯელაღსრულების სამინისტროს პრესსამსახურში განუცხადეს, პატიმრის ცემის ფაქტი არ დასტურდება. მათი ინფორმაციით, ქუთათელაძემ #6 დაწესებულებიდან #8 დაწესებულებაში გადაყვანის დროს წინააღმდეგობა გაუწია ბადრაგს, რის გამოც საჭირო გახდა ხელბორკილის დადება.