ცხინვალის დე-ფაქტო ხელისუფლების წარმომადგენლებმა ხურვალეთიდან გატაცებული დავით ვანიშვილი რამდენიმე საათის წინ გაათავისუფლეს.

გავრცელებული ინფორმაციის თანახმად, ვანიშვილების ოჯახს საოკუპაციო რეჟიმისთვის თავისუფლების სანაცვლოდ 5 ათასი რუსული რუბლის გადახდა მოუწიათ.

თუმცა აღნიშნული ინფორმაცია ოფიციალურად ამ დრომდე არ დასტურდება, რადგან დავით ვანიშვილი ამ დრომდე არც თანასოფლელებთან და არც ჟურნალისტებთან არ საუბრობს.

იგი შეიარაღებულმა ოკუპანტებმა გუშინ დილის საათებში ხურვალეთიდან იმ დროს დააკავეს, როდესაც სოფელში პენსიის ასაღებად იყო გასული და საკუთარ სახლში ბრუნდებოდა.

დავით ვანიშვილი მეუღლესთან და შვილიშვილთან ერთად 2012 წლის შემდეგ, მას შემდეგ რაც საოკუპაციო რეჟიმის წარმომადგენლებმა მავთულხლართები გაავლეს, ოკუპირებულ ტერიტორიაზე აღმოჩნდა. მას ოკუპანტები ნათესავებთან კომუნიკაციის უფლებას უკრძალავდნენ და ქართული მხარის კონტროლირებად ტერიტორიაზე გადასვლაზე უარს ეუბნეოდნენ. თუმცა ვანიშვილი ყოველ თვე პენსიის ასაღებად და სურსათის შესაძენად ქართული მხარის კონტროლირებად ტერიტორიაზე გადმოსვლას მაინც ახერხებდა. იგი ოკუპანტებს რამდენიმეჯერ ჰყავთ დაკავებული. სავარაუდოდ, მანამდეც დაკავების მიზეზი იყო ის, რომ ვანიშვილი ქართული მხარის კონტროლირებად ტერიტორიაზე გადმოვიდა.

გიორგი ახალკაცი, "ნიუპოსტი", გორი