კანონი „ ხელისუფლების გაწმენდის“ შესახებ მილიონამდე ადამიანს შეეხება, ამის შესახებ განცხადება უკრაინის პრემიერ-მინისტრმა არსენ იაცენუკმა მთავრობის სხდომაზე გააკეთა.

„ჩვენი გათვლებით, ამ კანონის მოქმედების ქვეშ მოყვება დაახლოებით მილიონი სხვადასხვა რანგის ჩინოვნიკი, სახელმწიფო მოხელე და სამართალდამცავი ორგანოების თანამშრომელი“- განაცხადა იაცენუკმა.

რადას დეპუტატის იური დერევიანკოს განცხადებით, მიღებული კანონის თანახმად, ლუსტრაციის სუბიექტი გახდება ყველა სახელმწიფო მოსამსახურე, ადგილობრივი თვითმმართველობების თანამშრომლების ჩათვლით, პრემიერ-მინისტრი, მინისტრების მოადგილეები, ცენტრალური ორგანოების ხელმძღვანელების მოადგილეები, გუბერნატორები, ყველა მოსამართლე და პროკურორი.

იმ პირებს, რომლებიც მაიდნის აქტივისტების მიმართ არასამართლებრივი გადაწყვეტილების მიღებაში იქნებიან მხილებული ნებისმიერი სახელმწიფო თანამდებობის დაკავება 10 წლით აეკრძალებათ.

ხოლო პირებს, რომელთა მოწოდებებიც მიმართული იყო უკრაინის დაყოფის და სეპარატიზმისკენ, სახელმწიფო ორგანოებში მუშაობა 5 წლით შეეზღუდებათ.

დღეს უკრაინის პრემიერ-მინისტრმა მოუწოდა ყველა სამინისტროს შექმნან ლუსტრაციის კომისიები, ასევე მან იუსტიციის სამინისტროს მოსთხოვა შეიქმნას ლუსტრაციის საკითხთან დაკავშირებული საზოგადოებრივი საბჭო.