ამერიკის შეერთებულმა შტატებმა ე.წ. ისლამურ სახელმწიფოსთან ბრძოლის ახალი სტრატეგიის ფარგლებში ისლამისტი ექსტრემისტების წინააღმდეგ პირველი საჰაერო ოპერაცია ჩაატარა.

აშშ-ის სამხედროებმა ერაყის ქალაქ სინჯართან და ბაღდადის სამხრეთ-დასავლეთით არსებული საბრძოლო პუნქტები გაანადგურეს, საიდანაც ისლამისტები ერაყის შეიარაღებულ ძალებს ცეცხლს უხსნიდნენ.

ე.წ. ისლამური სახელმწიფოს მებრძოლებმა ბოლო თვეების განმავლობაში ერაყში რამდენიმე შეტევა განახორციელეს და ქვეყნის სიდიდით მეორე ქალაქი მოსული და ტერიტორიის დიდი ნაწილი დაიკავეს. ერაყსა და სირიაში ისლამისტებმა ხალიფატი გამოაცხადეს და სასტიკად უსწორდებიან როგორც მოწინააღმდეგეებს, ასევე ეთნიკური და რელიგიური უმცირესობების წარმომადგენლებს.