ნარკოტიკული და ფსიქოტროპული ნივთიერებების შემცველი მედიკამენტების შემოტანის რამდენიმე მცდელობა გამოავლინეს 14 სექტემბერს საბაჟო გამშვები პუნქტის „ვალეს“ თანამშრომლებმა. კერძოდ, აშშ-ის მოქალაქე ა.ა.-ის ბარგის დათვალიერებისას მათ 18 აბი ნარკოტიკული ნივთიერების შემცველი პრეპარატი „დიფენოქსილატი“ აღმოაჩინეს. ასევე ფსიქოტროპული ნივთიერების შემცველი მედიკამენტი „კატარინ ფორტე“ (20აბი) აღმოჩნდა თურქეთის მოქალაქე ს.კ.-ის ხელბარგშიც, ხოლო აშშ-ის მოქალაქე ჯ.ე.ჟ.-ის ბარგის დათვალიერებისას შემოსავლების სამსახურის თანამშრომლებმა ფსიქოტროპული ნივთიერების შემცველი პრეპარატები - „დიაზეპამი“ (32 აბი) და „ოქსაზეპამი“ (4 აბი) აღმოაჩინეს.

ყველა ეს საქმე შემდგომი რეაგირებისთვის გადაეცა შსს სამცხე-ჯავახეთის საპატრულო პოლიციის მთავარი სამმართველოს საგამოძიებო სამსახურს.

იმავე დღეს სგპ „სარფის“ ტერიტორიაზე თურქეთის მხრიდან შემოვიდა საქართველოს მოქალაქე ნ.ა., რომელსაც დათვალიერებისას აღმოაჩნდა ნარკოტიკული ნივთიერების შემცველი მედიკამენტი ,,სუბოქსინი“ - 31 აბი და 1 ნატეხი. ეს საქმე შემდგომი რეგირების მიზნით შსს საპატრულო პოლიციის დეპარტამენტის აჭარის ავტონომიური რესპუბლიკის მთავარ სამმართველოს გადაეცა.