რუსეთის სამხედრო ხელისუფლება უკრაინასთან ომს უკვე 11 წელია გეგმავს, ამის შესახებ პუტინის ყოფილმა მრჩეველმა, ანდრეი ილარიონოვმა, ესტონურ გაზეთ Postimees-თან ინტერვიუში განაცხადა. მისი თქმით, უკრაინაში მიმდინარე კონფლიქტი, რუსეთ-უკრაინას შორის ომია.

„მადა ჭამაში მოდის“- აცხადებს ილარიონოვი და მაგალითებად ცხინვალის რეგიონში, აფხაზეთში და ყირიმში რუსეთის ქმედება მოყავს. ილარიონოვი თვლის, რომ ამ კონფლიქტის მოგვარება მოლაპარაკებებით შეუძლებელია, რუსეთის მიმართ ევროკავშირის სანქციებს კი ის „ანეკდოტურს“ უწოდებს.

ამა წლის მარტში პუტინის ყოფილმა მრჩეველმა შვედურ გამოცემასთან ინტერვიუში განაცხადა, რომ პუტინის შემდეგი სურვილი ფინეთის დაპყრობა იქნება. მისი თქმით, პუტინს სურს რუსეთს იმპერიის დროინდელი საზღვრები დაუბრუნოს, რაც ფინეთის და ბალტიის ქვეყნების დაპყრობასაც გულისხმობს.