ქობულეთში, აქციაზე დაკავებულ პირებთან დაკავშირებით ბათუმის სასამართლო განცხადებას ავრცელებს

„2014 წლის 12 სექტემბერს ბათუმის საქალაქო სასამართლომ განიხილა აჭარის ავტონომიური რესპუბლიკის მთავარი სამმართველოს ქობულეთის რაიონული სამმართველოდან შემოსული მასალები და ადმინისტრაციული სამართალდარღვევის ოქმები ა.გ-ს, ა.ყ-სა და ნ.ყ-ის მიმართ, გადაცდომაზე რაც გათვალისწინებულია საქართველოს ადმინისტრაციული სამართალდარღვევათა კოდექსის 166-ე მუხლებით, წვრილმანი ხულიგნობა, რაც შემდეგში გამოიხატა: 2014 წლის 11 სექტემბერს, დაახლოებით 20.35 საათზე, ქობულეთში, ლერმონტოვის ქუჩაზე ა.გ-ძე, ა. ყ-აძე და ნ. ყ-აძე ერთმანეთში კამათობდნენ, იგინებოდნენ და ილანძღებოდნენ ხმამაღლა.

სასამართლომ განიხილა ადმინისტრაციული სამართალდარღვევის ოქმები, მოისმინა მხარეთა ახსნა-განმარტებები, გაეცნო წარმოდგენილ მასალებს, შეამოწმა ადმინისტრაციული სამართალდარღვევის ოქმების დასაბუთებულობა და ა.გ-ძე, ა. ყ-აძე და ნ. ყ-აძე ცნობილი იქნენ სამართალდამრღვევებად საქართველოს ადმინისტრაციული სამართალდარღვევათა კოდექსის 166-ე მუხლით გათვალისწინებული გადაცდომის ჩადენაში და სახდელის ზომად დაენიშნათ ჯარიმა, 100-100 ლარის ოდენობით, სახელმწიფო ბიუჯეტის სასარგებლოდ.

სასამართლო ასევე მიუთითებს, რომ წარმოდგენილი მასალების და მხარეთა განმარტებების ანალიზით მითითებული პირების შემხებლობა 2014 წლის 09 სექტემბერს ქ.ქობულეთში მომხდარ ინციდენტთან დაკავშირებით არ გამოიკვეთა“, - ნათქვამია განცხადებაში.