უკრაინის უსაფრთხოების სამსახურმა შეძლო მოეგერიებინა რუსული სპეცსამსახურების მიერ განხორციელებული საინფორმაციო-ტექნიკური დივერსია, რომელიც უკრაინის მოქალაქეების პერსონალურ და სახელმწიფო ორგანოების სამსახურეობრივ ინფორმაციაზე წვდომის საფრთხეს შეიცავდა. ამის შესახებ ინფორმაციას უკრაინული მედია ავრცელებს.

გავრცელებული ინფორმაციით, ინტერნეტ მომხმარებლებს ელექტრონულ ფოსტაზე მისდიოდათ წერილი, სადაც თითქოს იყო ტერორისტების მიერ დატყვევებული მძევლების სია, რომელსაც ბმული სახელწოდებით „ ინფორმაცია დონეცკის და ლუგანსკის ტერიტორიაზე მყოფი ტერორისტების შესახებ“ ახლდა. დავირუსებულ ბმულზე გადასვლისას კი ჰაკერებს კომპიუტერის სრულად გაკონტროლება შეეძლოთ.

„ამ შემოტევის განეიტრალება შევძელით, მაგრამ მზად უნდა ვიყოთ რომ ეს დივერსია უკანასკნელი არ იქნება“- განაცხადა უსაფრთხოების სამსახურის წარმომადგენელმა მარკიან ლუბკივსკიმ. ლუბკივსკი უკრაინის მოქალაქეებს აფრთხილებს, რომ ყურადღებით გაეცნონ წერილის გამომგზავნის მისამართს, საეჭვო წერილის გახსნისგან თავი შეიკაონ და ყალბი გზავნილების შემთხვევაში სამართალდამცავ ორგანოებს მიაწოდონ ინფორმაცია.