უკრაინის პრეზიდენტი ხელისუფლების დეცენტრალიზაციის შესახებ კანონპროექტში ცვლილებების მიღებას აპირებს. პრეზიდენტის განცხადებით, გაძლიერდება თვითმმართველობის უფლებები, შეიქმნება მუნიციპალური საბჭოების მსგავსი მმართველი ორგანოები. რომლებიც თავად გადაწყვეტენ რა ენა უნდა იქნეს გამოყენებული მათ თვითმმართველ ტერიტორიაზე, რა კულტურული დღესასწაულები აღინიშნოს, როგორ დაიხარჯოს ადგილობრივი ბიუჯეტი.

ამასთანავე პოროშენკომ დააზუსტა , რომ საკითხები, რომელიც დაკავშირებული იქნება საგარეო, უშიშროების და სამხედრო სფეროებთან, ასევე ქვეყნის განვითარების სტრატეგიასთან ცენტრალური ხელისუფლების კომპეტენციაში რჩება.

პოროშენკომ ასევე ვადამდელი ადგილობრივი არჩევნების მნიშვნელობაზეც ისაუბრა. „ადგილობრივი არჩევნების ჩატარებით ჩვენ შევძლებთ კრიზისის დარეგულირებას, უნდა შეიქმნას ადამიანთა ჯგუფი, რომელთანაც შესაძლებელი იქნება დალაპარაკება, ეს ადამიანები უნდა წარმოადგენდნენ დონეცკელების და ლუგანსკელების ინტერესებს“.