უკრაინის პრეზიდენტის პეტრო პოროშენკოს განცხადებით, კანონი დონეცკის და ლუგანსკის ტერიტორიებისთვის განსაკუთრებული სტატუსის მინიჭების შესახებ, უკრაინის დამოუკიდებლობას და ტერიტორიულ მთლიანობას საფრთხეს არ შეუქმნის.

პოროშენკოს თქმით მას სურს დაამშვიდოს ყველა, ვინც ამ კანონის გამო ღელავს „თქვენ ამ კანონში ვერ ნახავთ ვერანაირ საფრთხეს, რომელიც შეიძლება დაემუქროს ჩემი ქვეყნის ტერიტორიულ მთლიანობას, სუვერენიტეტს და დამოუკიდებლობას.

ამასთანავე პოროშენკომ ამნისტიის კანონის მიღებაზეც ისაუბრა, იმ პირების მიმართ რომელთაც მძიმე დანაშაული არ აქვთ ჩადენილი, პრეზიდენტის აზრით ეს დიალოგის წარმოებას შეუწყობს ხელს.

პრეზიდენტის წარმომადგენლის აღმოსავლეთ უკრაინაში სიტუაციის დარეგულირების საკითხში ირინა გერაშენკოს განცხადებით, დონეცკის და ლუგანსკის რეგიონებისთვის განსაკუთრებული სტატუსის მინიჭების შესახებ კანონპროექტზე მუშაობა მიმდინარეობს და მომავალ კვირას კანონპროექტის განხილვა უკვე პარლამენტში მოხდება. გერაშენკომ აღნიშნა , რომ კანონპროექტი არანაირად არ გულისხმობს ქვეყნის ფედერალიზაციას, განსაკუთრებულ სტატუსში უმეტესწილად ეკონომიკური და ჰუმანიტარული საკითხები განიხილება.