"დაქალი ბიჭის სიყვარულში მეცილება"

ეს საინტერესოა - 11:12, 12 Sep, 2014

5210

"გამარჯობა! ამ წერილს 17 წლის გოგო გწერთ. დაქალის უცნაური საქციელი უკვე ყელში ამოვიდა. შეიძლება ჯობდა, მასთან ასე ახლო ურთიერთობა არც მქონოდა და დედისთვის დამეჯერებინა, რომელიც სულ მეუბნებოდა, ეგ კარგ მეგობრობას არ გაგიწევსო.

ყველაფერში მეჯიბრება, სულ ცდილობს, რაღაცეები დამასწროს და ის, რაც ჩემი მოფიქრებულია, თვითონ მიიწეროს. ამას დიდ ყურადღებას არ ვაქცევდი, მაგრამ ახლა, როგორც იტყვიან, დაუკრეფავში გადავიდა.

დიდი ხანია ერთი ბიჭი მომწონს, მაგრამ საკუთარ თავსაც არ ვუმხელდი ამას. მერე მისგანაც ვიგრძენი ყურადღება და ჩემში გრძნობებმა იფეთქა. პირველი ადამიანი, ვისაც ჩემი საიდუმლო გავანდე, მეგობარი იყო. მან კი მაშინვე მომიგო, ეგ ბიჭი მეც ხომ ძალიან მომწონს და, მგონი, კიდეც მიყვარსო. ვუთხარი, აქამდე არასოდეს გითქვამს–მეთქი. ის კი პირზე დამადგა, როგორ არა, გითხარიო. არადა ასეთი რამ როგორ დამავიწყდებოდა?! წარმოიდგინეთ, იმ ბიჭზე რომ რამე ეთქვა, რომელიც მე სიგიჟემდე მომწონდა, რეაქცია არ მექნებოდა? ყურადღებას არ მივაქცევდი? მაგრამ იტყუება! ზუსტად ვიცი, იმ ბიჭს ყურადღებას არც აქცევდა, მაგრამ რადგან მე მომეწონა, მაშინვე თქვა, მიყვარსო.

მეგობრის ეშმაკობას ძალიან კარგად ვხვდები. თუ მე იმ ბიჭთან ურთიერთობას დავიწყებ, ყველას ეტყვის, აი, ნახეთ, მე მომწონდა, მიყვარდა და დაქალი მართმევსო. საკუთარი თავი კარგ პოზიციაში ჩააყენა და მე გამოვყავარ ცუდი. ჩვენს საერთო მეგობრებსაც უთხრა, ვითომ ჩემთვის ჰქონდა ნათქვამი, ის ბიჭი რომ უყვარდა, მე კი მას სიყვარულში ვეცილები, არადა პირიქითაა. ისიც ზუსტად ვიცი, თუ ვეტყვი, რომ ის ბიჭი სულაც აღარ მომწონს, მის მიმართ ჩემი დაქალიც დაკარგავს ინტერესს, მაგრამ ასე არ მოვიქცევი.

ზოგი ჭირი მარგებელიაო, ამბობენ და ეს ჩემთვისაც კარგი გაკვეთილი იქნება. უკვე მივხვდი, რომ მისი ნდობა არ შეიძლება. მით უმეტეს, მასთან დაქალობა არ ღირს, ნებისმიერ დროს გამყიდის. იმ ბიჭზე ფიქრს როგორმე თავიდან ამოვიგდებ, არც მას მივცემ უფლებას, ჩემ მიმართ რაიმე გრძნობა გაამჟღავნოს, მაგრამ დაქალსაც დავივიწყებ. ჯობია, სხვადასხვა გზით ვიაროთ, ვიდრე ერთმანეთის ცხოვრებაში ასე შევიჭრათ. ასეთი მეგობარი ნამდვილად არ მჭირდება".

წყარო: sana.ge