შოტლანდიის დამოუკიდებლობის აღიარების შემთხვევაში ყირიმის აღიარება ავტომატურად უნდა მოხდეს, ამის შესახებ განცხადება ყირიმის მარიონეტული მთავრობის ხელმძღვანელმა სერგეი აკსიონოვმა გააკეთა.

„თუ დასავლეთი შოტლანდიის რეფერენდუმის შედეგებს აღიარებს, ყირიმის აღიარებაც ავტომატურად უნდა მოხდეს. ეს ნამდვილად სწორი გზაა და ჩვენ აუცილებლად მხარს დავუჭერთ ამ რეფერენდუმს“, - აღნიშნა აკსიონოვმა.

აკსიონოვის განცხადებით , ანალოგიურ შემთხვევებზე დასავლეთი შერჩევით პოზიციებს იკავებს. მისი თქმით რეფერენდუმის გამო ყირიმს საჯაროდ ამცირებენ და შეურაცხყოფენ და ბიზნესის კეთების შესაძლებლობას არ აძლევენ. „საინტერესოა, როგორ მოიქცევიან საკუთარი მოქალაქეების მიმართ ანალოგიურ შემთხვევაში?“- აღნიშნა აკსიონოვმა.

შეგახსენებთ, რომ რეფერენდუმი ყირიმში ნახევარკუნძულის მომავალი სტატუსის შესახებ 2014 წლის 16 მარტს ჩატარდა. რეფერენდუმში მონაწილეთა 96.7%-მა ხმა რუსეთთან მიერთებას მისცა.