სასჯელაღსრულების სამინისტრო განცხადებას ავრცელებს

სამართალი - 16:15, 25 Dec, 2012

419

სასჯელაღსრულების, პრობაციისა და იურიდიული დახმარების საკითხთა სამინისტრო განმარტავს, რომ #148 ბრძანების საფუძველზე ციხეების საზოგადოებრივი მონიტორინგის ჯგუფს უფლებამოსილების ვადა 2013 წლის 1 იანვარს ეწურება. ბრძანება ხელმოწერილია გ.ტუღუშის მიერ, რაც ცალსახად გამორიცხავს ნებისმიერ სპეკულაციას ბრძანების მოქმედების ვადებთან დაკავშირებით. (ბრძანების ორიგინალი შეგიძლიათ იხილოთ თანდართული ფაილის სახით - http://www.mcla.gov.ge/?action=news&lang=geo&npid=1023)

რაც შეეხება მოსაზრებას, თითქოს სამინისტრო ზღუდავს ჟურნალისტების მონაწილეობას სასჯელაღსრულების ალტერნატიული მონიტორინგის მექანიზმის მონაწილეობაში, სინამდვილეს არ შეესაბამება. აღნიშნული გადაწყვეტილება მიღებული იქნა ხმათა უმრავლესობით 22-23 დეკემბერს, გაერო-ს განვითარების პროექტის მხარდაჭერით გუდაურში გამართულ შეხვედრაზე, რომელსაც ადგილობრივი და საერთაშორისო არასამთავრობო ორგანიზაციების წარმომადგენლები ესწრებოდნენ, სადაც სასჯელაღსრულების, პრობაციისა და იურიდიული დახმარების სამინისტრო მხოლოდ მოდერატორის ფუნქციას ასრულებდა. ამავე შეხვედრაზე გადაწყდა მონიტორინგში მოქმედი ადვოკატების მონაწილების შეზღუდვის საკითხიც. ალტერნატიული მონიტორინგის მექანიზმებთან დაკავშირებით შეხვედრების ორგანიზებით სამინისტრომ გამოხატა კეთილი ნება და აღნიშნული საკითხის დარეგულირება სამოქალაქო სექტორს მიანდო", - ნათქვამია სამინისტროს მიერ გავრცელებულ განცხადებაში.