ბათუმის პოლიციის უფროსი ,,შაკო კასპიდან“ სამსახურიდან გაათავისუფლეს

სამართალი - 14:26, 07 Sep, 2014

6895

ბათუმის საქალაქო სამმართველოს მეოთხე განყოფილების უფროსი, შალვა ჯანიყაშვილი დაკავებული თანამდებობიდან გაათავისუფლეს. ინფორმაციას ამის შესახებ შინაგან საქმეთა სამინისტროს პრესსამსახურში ადასტურებენ. როგორც უწყების პრესსამსახურში განმარტავენ, მედიაში გავრცელებული ინფორმაციის საფუძველზე, შს სამინისტროს გენერალურმა ინსპექციამ ჩაატარა სამსახურეობრივი მოკვლევა, რისი დასკვნის საფუძველზეც შალვა ჯანიყაშვილი გადაყვანილია კადრების განკარგულებაში.

ბათუმში 3 სექტემბერს, ბათუმგორაზე პოლიიციის თანამშრომლები "პიკაპის" ტიპის ავტომანქანით მივიდნენ (მანქანის ნომერი CIC 221). პოლიციელი მანქანის რუპორში საშინელი სიტყვებით იგინებოდა. ,,ერთ-ერთი პოლიციელი, რომელსაც ლურჯი პერანგი ეცვა და და საშინლად მთვრალი იყო მანქანიდან გადმოვიდა, ხელში იარაღი ეჭირა და ხმამაღლა გაიძახოდა, რომ შაკოა კასპიდან, ბათუმის მეოთხე სამმართველოს უფროსი“, - განუცხადა "ბათუმელებს" თვითმხილველმა, რომელიც ირწმუნებდა, რომ პოლიციის თამაშრომლები არაფხიზელ მდგომარეობაში იმყოფებოდნენ და საზოგადოებრივ წესრიგს არღვევდნენ.

ბათუმის საქალაქო სამმართველოს პოლიციის მეოთხე განყოფილების უფროსი შალვა (შაკო) ჯანიყაშვილია.

ის "ბათუმელებთან" სატელეფონო საუბარში აცხადებდა, რომ იმ დღეს მუშაობდა, თუმცა ზუგდიდში იმყოფებოდა. მისივე მტკიცებით, არ იცის ვინ მართავდა ავტომანქანას, რომლის სახელმწიფო ნომერია CIC 221 (ფოტო გადაღებულია თვითმხილველის მიერ). შალვა ჯანიყაშვილმა ასევე უარყო იმის შესახებ ინფორმაციაც, რომ დღეს ბათუმგორაზე იმყოფებოდა.

ვინ მართავს შინაგან საქმეთა სამინისტროს კუთვნილ ავტომანქანას სახელმწიფო ნომრით CIC 221, სად იმყოფებოდა ბათუმის საქალაქო სამმართველოს პოლიციის მეოთხე განყოფილების უფროსი შალვა (შაკო) ჯანიყაშვილი და ასრულებდა თუ არა ის დღეს სამსახურებრივ მოვალეობას ბათუმში? - მას შემდეგ, რაც შინაგან საქმეთა სამინისტროს "ბათუმელებმა"ამ კითხვებით მიმართა და ბათუმგორაზე მომხდარი ფაქტის შესახებ ინფორმაცია მიაწოდა, უწყების პრესსამსახურში განმარტეს, რომ ფაქტთან დაკავშირებით გენერალურმა ინსპექცამ მოკვლევა დაწყო.