კემერონი: NATO-ს ერთობლივი წვრთნები უნდა ჩატარდეს იორდანიისა და საქართველოს ტერიტორიაზე

მსოფლიო - 14:12, 05 Sep, 2014

1522

უელსში NATO-ს სამიტის მეორე სამუშაო დღე გაიხსნა. სამიტზე სიტყვით დიდი ბრიტანეთის პრემიერ-მინისტრი დევიდ კამერონი გამოვიდა. კამერონმა ნატოს წინაშე მდგომ ახალ საფრთხეებზე ისაუბრა.
კამერონის თქმით, აღმოსავლეთით ეს არის რუსეთი, რომელიც სუვერენული უკრაინის წინააღმდეგ აგრესიულ პოლიტიკას ახორციელებს, ხოლო სამხრეთით, ეს არის დესტაბილიზაცია ჩრდილოეთ აფრიკასა და ახლო აღმოსავლეთში. ამ საფრთხეებთან გასამკლავებლად კამერონმა 3 პუნქტიანი გეგმა წარმოადგინა.
კამერონის განცხადებით, 1. NATO-მ უნდა დაარწმუნოს აღმოსავლეთ ევროპის პარტნიორები, რომ ალიანსი ყოველთვის მზადაა აღასრულოს NATO-ს მე-5 მუხლით გათვალისწინებული პირობები. კოლექტიური თავდაცვის განმტკიცების მიზნით, NATO უნდა შეთანხმდეს მრავალეროვანი წამყვანი ძალების ჩამოყალიბებაზე, რომელიც მსოფლიოს ნებისმიერ წერტილში განლაგებას 2-5 დღეში შეძლებს. NATO-ს რეფორმირებული საპასუხო ძალების სათაო ოფისი პოლონეთში განთავსდება. ხოლო სხვადასხვა შენაერთები განლაგდება აღმოსავლეთ ევროპის მოკავშირე ქვეყნებში. აღნიშნულ საკითხზე შეთანხმების შემთხვევაში, გაერთიანებული სამეფო მზადაა ახალ მრავალეროვან ძალებში 3000-5000 კონტიგენტამდე წარადგინოს.
2. NATO-მ საკუთარი შესაძლებლობები უნდა გაზარდოს. გაერთიანებული სამეფო მზადაა GDP-ის 2 % თავდაცვაზე დახარჯოს, ხოლო ამ თანხის 20 % შეიარაღებას მოახმაროს. ეს იქნება ძლიერი მესიჯი მათთვის, ვინც მსოფლიოში მშვიდობის ხელყოფას ცდილობს. NATO-მ უნდა შეძლოს, რომ კრიზისს უპასუხოს სწრაფად და კოლექტიურად.
3. NATO-მ პარტნიორობისა და უსაფრთხოების ქსელი უნდა გააფართოოს. NATO უნდა გადაიქცეს ისეთ ორგანიზაციად, რომელიც არა მხოლოდ ფლობს შესაძლებლობებს, არამედ ეს შესაძლებლობები ექსპორტზე გააქვს. აგრეთვე, NATO-ს ერთობლივი წვრთნები უნდა ჩატარდეს იორდანიისა და საქართველოს ტერიტორიაზე. აგრეთვე ერაყშიც, როდესაც იქ ახალი მმართველობა ჩამოყალიბდება.