ბათუმში მომხდარი ინციდენტის შედეგად დაზარალებული ქალბატონი უარყოფს ინფორმაციას, რომ მის მიმართ რაიმე სახის ექსპლუატაციის ფაქტი განხორციელდა.

შსს-ს პრესსამსახურის უფროსის ნინო გიორგობიანის ინფორმაციით, დაზარალებული ქალბატონი გუშინვე დაიკითხა და მან არც პასპორტის ჩამორთმევის ფაქტი არ დაადასტურა.

რაც შეეხება მის ცემაში ბრალდებულ მამაკაცს, მას ბრალი 125-ე მუხლის 1-ლი ნაწილით უკვე წაუყენეს.

„გუშინ ბათუმში თურქმენეთის მოქალაქის ცემის ფაქტთან დაკავშირებით, გაცნობებთ, რომ დაზარალებული ქალბატონი გუშინვე გამოკითხეს შსს-ს ცენტრალური კრიმინალური პოლიციის დეპარტამენტის ტრეფიკინგის და უკანონო მიგრაციის განყოფილების თანამშრომლებმა, რის შედეგადაც ტრეფიკინგის ფაქტი არ დადასტურდა. აღნიშნულმა ქალბატონმა უარყო მისთვის პასპორტის ჩამორთმევის ფაქტი და განაცხადა, რომ მისთვის არავის შეუზღუდია თავისუფლება და მის მიმართ რაიმე სახის ექსპლუატაციის ფაქტი არ განხორციელებულა. დაზარალებულ ქალბატონს ასევე სამხარაულის სახელობის ექსპერტიზის ბიუროში ჩაუტარდა სასამართლო-სამედიცინო ექსპერტიზა, რომლის შედეგედაც დადგინდება მიღებული დაზიანებების ხარისხი. რაც შეეხება მის ცემაში ბრალდებულ მამაკაცს, მას ბრალი 125-ე მუხლის 1-ლი ნაწილით უკვე წაუყენეს“, - წერს ნინო გიორგობიანი „ფეისბუქზე“.

ბათუმში გუშინ ახალგაზრდა მამაკაცმა ტურისტი ქალბატონი სცემა.