ქორწინების იძულება სისხლის სამართლის დანაშაული ხდება. ცვლილება სისხლის სამართლის კოდექსში შევიდა, რომელსაც ქორწინების იძულების მუხლი მოემატა.

ცვლილებები უკვე მესამე მოსმენით მიიღეს. ახალი მუხლის მიხედვით, ქორწინების, მათ შორის არარეგისტრირებული ქორწინების იძულება, დაისჯება საზოგადოებისთვის სასარგებლო შრომით - ვადით 200-დან 400- საათამდე, ან თავისუფლების აღკვეთით, ვადით 2-დან 4 წლამდე. იგივე ქმედება კი, ჩადენილი წინასწარი შეცნობით, არასრულწლოვნის მიმართ, დაისჯება თავისუფლების აღკვეთით, ვადით 2-დან 4 წლამდე.

აღნიშნული თემის შესახებ „ალიას“ კანონპროექტის ინიციატორი, საპარლამენტო უმრავლესობის დეპუტატი გუგული მაღრაძე ესაუბრა:

„როცა შვილს ან ახლობელ ადამიანს აიძულებენ, გაჰყვეს რომელიღაც კონკრეტულ პირს ცოლად, ეს იძულება არის სიტყვიერი, არის მუქარა. ეს სისხლის სამართლის მოკვლევის საგანი ხდება და დგინდება, იყო თუ არა იძულება ქორწინებისთვის“, - აცხადებს მაღრაძე.

მისივე განცხადებით, პირი რომელიც მსგავს ქმედებას ჩაიდენს და შედეგად მოძალადე გამოვლინდება, ვალდებული იქნება გაიაროს „ძალადობრივი ქცევის დამოკიდებულების შეცვლის სპეციალური სასწავლო კურსები, ტრენინგევი და ა.შ“

„ასეთი სიტუაციაა, როცა ოჯახში ძალადობა ხდება, არ უნდათ, რომ მოძალადე დააჭერინონ, ამიტომ პოლიციას იძახებენ, რომელიც შემაკავებელ ორდერს წერს და განარიდებს მოძალადეს და მსხვერპლს ერთმანეთისგან. შემდეგ ამ საკითხს სასამართლო განიხილავს და მოძალადეს ეკრძალება მსხვერპლთან მიკარება 6 თვის განმავლობაში. თუ ის ამ აკრძალვას დაარღვევეს, შემდეგ იწყება სისხლის სამართლებრივი დევნა და მიდის ციხეში, მაგრამ მას როცა ეს 6 თვე დაეკისრება, მაშინ ხდება ვალდებული, რომ გაიაროს ეს სპეციალური კურსები, რომელიც ადამიანის განწყობების შეცვლას ემსახურება“, - აცხადებს დეპუტატი.