შინაგან საქმეთა სამინისტო თავდაცვის მინისტრის მეუღლის ნათია ფანჯიკიძის მიერ ლაშა მახარაძის გარდაცვალებასთან დაკავშირებით გავრცელებულ ინფორმაციას პასუხობს.

როგორც „ნიუპოსტს“ შსს-ში განუცხადეს, ინფორმაცია, რომ მახარაძის მკვლელი შს მინისტრის მეგობარია არასწორია.

„ინფორმაცია, რომ მახარაძის მკვლელი ჭიკაიძის მეგობარია არასწორია. ამ ეტაპზე დადგენილია დამნაშავის ვინაობა და მიმდინარეობს მისი ძებნის ოპერაცია“, - აცხადებენ შსს-ში.

თავდაცვის მინისტრის ირაკლი ალასანია მეუღლე ნათია ფანჯიკიძე ბარნოვის ქუჩაზე მომხდარ მკვლელობასთან დაკავშირებით ახალ დეტალებს „ფეისბუქზე“ წერს.

„გუშინ მოკლული ლაშა მახარაძის მკვლელს დემონსტრატიულად ხელს არ კიდებს პოლიცია, რამაც ამ ბიჭის მეგობრებში გამოწვია ხმები, ჭიკაიძის ნათესავიაო.. სამაგიეროდ, ამ საცოდავი ბიჭის ძმაკაცებს, როგორც მათმა მეგობარმა გოგომ მითხრა, "იპარავენ" პანაშვიდიდან, ვითომ დაკითხვის მიზნით და უკვე მესამე წაიყვანეს და აღარ უშვებენო, ასევე ამბობენ, ცემენო. რა ხდება? ამგვარი გაუგებრობა არავის არ შერჩება და კარგი იქნება, თუ მითქმა-მოთქმის საფუძველი არ იარსებებს. მე არ ვარ ჭორების გამავრცელებალი და არც ისე უბრალოდ პანიკის მთესველი. ადამიანს, რომელმაც ამ წამს ტირილით დამირეკა, ვენდობი და ის კატეგორიაა, რომელსაც ცხოვრებაში ტყუილი არ უთქვამს“, - წერს ნათია ფანჯიკიძე.