უკრაინის პრეზიდენტი პეტრო პოროშენკო ბრიუსელში მოლაპარაკებებს მართავს. ევროკავშირის სამიტის დაწყებამდე პროშენკო ევროსაბჭოს პრეზიდენტ ჰერმან ვან რომპეის შეხვდა. პოროშენკო სამიტზე სიტყვითაც გამოვა. სამიტის დაწყებამდე პოროშენკომ ბაროზუსთან ერთად გამართულ ბრიფინგზე ჟურნალისტებს სიტყვით მიმართა:

„მინდა გამოვიყენო ეს შემთხვევა და მადლობა გადავუხადო ჰერმან ვან რომპეისა და ბატონ ბაროზუს მოწვევისთვის. სამწუხაროდ, ეს ვიზიტი ჩემი ქვეყნისთვის განსაკუთრებულ მძიმე პირობებში იმართება. კონსოლიდირებული საერთაშორისო მცდელობების მიუხედავად უკრაინა უცხო ქვეყნის სამხედრო აგრესიისა და სამხედრო მოქმედებების ობიექტია.

უკრაინის ტერიტორიაზე ათასობით ჯარისკაცისა და ტანკის ყოფნა საფრთხეს უქმნის მშვიდობასა და სტაბილურობას, არა მხოლოდ უკრაინაში, არამედ მთელს ევროპაში. კარგად გვესმის, რომ არ არსებობს ამ კონფლიქტის სამხედრო გადაჭრის გზა, დარწმუნებული ვარ, რომ თუ უკრაინას თავად ექნება არჩევანი გადაჭრას პრობლემები, ომი უკრაინის ტერიტორიაზე აღარ იქნება“, - განაცხადა პოროშენკომ.