ებოლას ვირუსით დაავადების შემთხვევა დასავლეთ აფრიკის ქვეყანაში, სენეგალშიც დაფიქსირდა. ამის შესახებ ინფორმაციას Agence France-Press ავრცელებს.

რესპუბლიკის ჯანდაცვის სამინისტროს ინფორმაციით - ახალგაზრდა მამაკაცი, რომელიც სავარაუდოდ კონაკრში დაავადდა, სენეგალში 21 აგვისტოს გადავიდა. სწორედ ამავე დღეს მიიღო დაკარმა საზღვრის ჩაკეტვის გადაწყვეტილება.

გვინეის მოქალაქე კარანტინში მოათავსეს. სამედიცინო პერსონალის განცხადებით, ახალგაზრდა მამაკაცის ჯანმრთელობის მდგომარეობა დამაკმაყოფილებელია. ამ დროისათვის შესაბამისი სამსახურები ცდილობენ იმის დადგენას, თუ ვისთან ჰქონდა მას ამ დღეების განმავლობაში კონტაქტი.

ებოლას ვირუსის აფეთქება მიმდინარე წლის თებერვალში გვინეაში დაფიქსირდა, მოგვიანებით ვირუსი მეზობელ სიერა-ლეონეში, ლიბერიასა და ნიგერიაში გავრცელდა. 25 აგვისტოს ცნობილი გახდა, რომ მომაკვდინებელმა ვირუსმა კონგოს დემოკრატიულ რესპუბლიკამდეც მიაღწია, სადაც ვირუსით მინიმუმ ორი ადამიანი დაიღუპა.

უკანასკნელი მონაცემებით ებოლას ვირუსით გარდაცვალების შემთხვევებმა 1552-ს მიაღწია, ვირუსით დაავადებულთა საერთო რაოდენობა კი 3069-ს შეადგენს.

ანანო კვაჭანტირაძე