თბილისის საქალაქო სასამართლო გიგი უგულავას სასამართლო პროცესი გაიმართა. საუბარია „განვითარების ფონდის“ საქმეზე, რომელზეც ბრალდება თბილისის ყოფილ მერს 48 მილიონის გაფლანგვას ედავება. ამ საქმეზე გიგი უგულავას 50 ათას ლარიანი გირაო აქვს შეფარდებული.

გიგი უგულავას სასამართლო პროცესი პირველი სექტემბრისთვის გადაიდო. შესავალი სიტყვის წარმოთქმა დღეს მხოლოდ ბრალდების მხარემ მოახერხა. ტექნიკური მიზეზების გამო, შესავალ სიტყვას დაცვის მხარე უკვე პირველ სექტემბერს წარმოთქვამს.

განცხადებები გააკეთა თავად ბრალდებულმა გიგი უგულავამ. ის გამოეხმაურა მის მიმართ წაყენებულ ბარლდებებს და განაცხადა, რომ ეს არის ცინიზმი და სამართლებრივი უგუნურება, როდესაც ბიძინა ივანიშვილი ედავება იმაში, რაც თავად 2012 წელს ჩაიდინა. უგულავას მტკიცებით, 2012 წელს პარტიის დაფინანსების მიზნით, ბიძინა ივანიშვილმა თავისი პოლიტიკური გუნდის წევრებთან ერთად შემოიტანა მილიარდი დოლარი, რაშიც უგულავას განცხადებით, ჩართულნი იყვნენ სასულიერო პირებიც.

თბილისის ყოფილმა მერმა პროკურატურის წარმომადგენლებს მოუწოდა, რომ ის მასალები, რომელიც ამ ფაქტს ადასტურებს არის პროკურატურაში და არ გაანადგურონ ეს ფაქტები.

„ამ სასამართლო განხილვის დროს ძალიან ბევრი სიურპრიზი გამოჩნდება, თუ როგორ ცდილობდნენ დღევანდელი ხელისუფლების წარმომადგენლები, ვინც დღეს აქ არიან, ზეწოლის მოხდენას. ბიძინა ივანიშვილმა თავისი დანაშაული „გაიპრავა“ და ზუსტად იგივე დანაშაულს გვაბრალებს ჩვენ და ამ ადამიანებმა, რომელბიც იმ უწყებაში მუშაობდნენ, ეს ყველაფერი ძალიან კარგად იციან, ამ დანაშაულის ამსახველი მასალა პროკურატურაში იდო და მე იმედი მაქვს, რომ კვლავ დევს“,- განაცხადა უგულავამ.

ნინა შადური