საპარლამენტო უმცრესობის წევრის დავით ბაქრაძის დაკითხვა შეჩერდა. ამის შესახებ დეპუტატის ადვოკატმა გიორგი ჩივიაშვილმა განაცხადა.

ადვოკატმა მიზეზებიც განმარტა, როგორც გაირკვა, საგამოძიებო უწყებამ ბაქრაძისა და მისი მეუღლის, მაკა მეტრეველის დაკითხვა ერთდროულად დაიწყო, იმის გამო, რომ მათ ერთი ადვოკატი ჰყავთ, დაკითხვა შეჩერდა.

ადვოკატ გიორგი ჩივიაშვილის განცხადებით, პროკურატურამ არ გაითვალისწინა ის გარემოება, რომ ბაქრაძეს და მეტრეველს ერთი და იგივე ადვოკატი იცავდა და არ გამიჯნა დაკითხვის პროცესი. ადვოკატი აცხადებს, რომ ამით პროკურატურამ კანონი და მოწმეთა უფლებები უხეშად დაარღვია.

"ვინაიდან პარალელურად მიმდინარეობდა ორივეს დაკითხვა, შეჩერდა დავით ბაქრაძის დაკითხვა და ჩემი შესვლის შემდეგ დაკითხვა განახლდება. ბაქრაძის დაკითხვას დავესწრები მე", - განაცხადა ჩივიაშვილმა.

ნინა შადური