ქუთაისის №2 სასჯელაღსრულების დაწესებულებაში პატიმრები შიმშილობას აგრძელებენ

ციხეში მოშიმშილე 6 პატიმარს ინდივიდუალური მოთხოვნები გააჩნია. მათი ნაწილი საქმეების თავიდან გამოძიებას და განაჩენების გადახედვას, ნაწილი კი ციხის ადმინისტრაციისგან ყურადღებას ითხოვს.

ერთ-ერთი პატიმარი ჯაბა შავაძე, რომელსაც პირი დაახლოებით სამი კვირის განმავლობაში ჰქონდა ამოკერილი, საავადმყოფოში გადაიყვანეს.

„ჩემი მეუღლე მე-15 დღეა, შიმშილობს. ნახვის უფლებას არ მაძლევენ და არ ვიცი მისი ჯანმრთელობის მდგომარეობა როგორია. საქმის პროკურორი იყო მასთან შესული და უთხრა, აზრი აქვს შენს შიმშილობას, მოსამართლე მაინც ჩვენს მტკიცებულებებს დაეყრდნობაო. ჩემი მეუღლის საქმე სასამართლო განხილვის ეტაპზეა. ყაჩაღობას აბრალებენ, თუმცა არ ჩაუდენია. საპროცესო შეთანხმების გაფორმებაზე იყო საუბარი პროკურატურის მხრიდან, თუმცა ჩემი მეუღლე ამის წინააღმდეგია“, - აცხადებს ერთ-ერთი პატიმრის გიორგი ანდრიაძის მეუღლე თამილა გოქაძე.

სახალხო დამცველის იმერეთის ოფისში აცხადებენ, რომ ომბუდსმენის რწმუნებულები ციხეში დღეს შევლენ და მოშიმშილე პატიმრებს შეხვდებიან.

ნინა შადური