ფოთის საკრებულოს თავმჯდომარის მოადგილის ზურაბ ფაჩულიას ცოლ-შვილი დაიკარგა. ფაჩულიას ინფორმაციით, მისი მეუღლე ნათია ხინჩიაშვილი მცირეწლოვან შვილთან ანასტასია ფაჩულიასთან ერთად, გუშინ ფოთში ბაღდათიდან 17:00 საათისთვის ჩავიდა, რის შემდეგაც მისი კვალი იკარგება.

ოჯახის წევრები მასთან ტელეფონზე დაკავშირებას ვერ ახერხებენ, რადგან მისი ნომერი გამორთულია. პოლიცია უკვე ესაუბრა იმ მიკროავტობუსის მძღოლს, რომელმაც გაუჩინარებული დედა-შვილი ფოთში ჩაიყვანა.

მძღოლი აცხადებს, რომ ნათია ხინჩიაშვილი მცირეწლოვან შვილთან ერთად ფოთის ბაზართან ჩამოსვა, სადაც მას ქალი და მამაკაცი დახვდნენ. სხვა ინფორმაცია მძღოლს არ გააჩნია.

საკრებულოს თავმჯდომარის მოადგილემ პოლიციაში განცხადება უკვე შეიტანა.

ზურაბ ფაჩულია კოალიცია “ქართული ოცნების” წევრია და ადგილობრივი თვითმმართველობის არჩევნებზე ფოთში სიის პირველი ნომერი იყო.

ნინა შადური