ოლეგ მელნიკოვის საპროცესო შეთანხმების დეტალები ცნობილია

სამართალი - 18:03, 25 Aug, 2014

2358

იმ შემთხვევაში თუ მოსამართლე საპროცესო შეთანხმებას დაამტკიცებს, ოლეგ მელნიკოვს ორწლიანი პატიმრობა, 2 წელი პირობითი მსჯავრი, 2 წელი გამოსაცდელი ვადა და ერთი წლით საქმიანობის ჩამორთმევა მიესჯება.

როგორც პროკურორი ირაკლი ნადარეიშვილი აცხადებს, მელნიკოვმა აღიარა დანაშაული, ითანამშრომლა გამოძიებასთან, ამხილა თანამონაწილე და ორგანიზატორი პირები, შესაბამისად, მოქმედი კანონმდებლობიდან გამომდინარე, მთავარმა პროკურატურამ მასთან საპროცესო შეთანხმება გააფორმა.

“როდესაც შუამდგომლობას დავაყენებთ, მას განესაზღვრება ორი წლით თავისუფლების აღკვეთა - რეალური სასჯელი, ორი წელი პირობითი მსჯავრი, ორი წელი გამოსაცდელი ვადა და ერთი წლით საქმიანობის ჩამორთმევის უფლება”, - განაცხადა ნადარეიშვილმა.

პროკურორის ინფორმაციით, საპროცესო შეთანხმება მოსამართლის მხრიდან დამტკიცებას მოითხოვს.

ცნობისთვის, სანდრო გირგვლიანის საქმეზე გამართულ პროცესზე, პროკურატურის მიერ დაყენებული შუამდგომლობის საფუძველზე ოლეგ მელნიკოვის საქმე ცალკე წარმოებად გამოიყო, სხვა ბრალდებულების-ვანო მერაბიშვილის, გერონტი ალანიასა და ვალერიან მეტრეველის საქმის განხილვა კი, საერთო წესების დაცვით გაგრძელდება.

ნინა შადური