საბაჟო კონტროლისაგან ფარულად დიდი ოდენობის საიუველირო ნაკეთობების გადმოტანის ფაქტზე მოქალაქე ესმრა ქაია ფინანსთა სამინისტროს საგამოძიებო სამსახურის თანამშრომლებმა დააკავეს.

გამოძიებით დადგინდა, რომ 2014 წლის 21 აგვისტოს, ესმრა ქაიამ, საქართველოს საბაჟო გამშვები პუნქტი „სარფის“ გადმოკვეთისას, არ შეასრულა მასზე კანონით დადგენილი მოვალეობა და საბაჟო კონტროლისაგან მალულად, დიდი ოდენობის ოქროს ნაკეთობები საქართველოს ტერიტორიაზე გადმოიტანა.

დანაშაულში ბრალდებული განუბაჟებელ ნივთებთან ერთად საგამოძიებო სამსახურმა საბაჟო გამშვებ პუნქტთან, საზღვრის გადმოკვეთის შემდეგ დააკავა.

გამოძიება საქართველოს სისხლის სამართლის კოდექსის 214-ე მუხლის I ნაწილით მიმდინარეობს, რაც თავისუფლების 3-დან 5 წლამდე აღკვეთას ითვალისწინებს.