NATO-ს საჰაერო პატრულირება ბალტიისპირეთში, სამხედრო გემები ბალტიისა და შავ ზღვებში

მსოფლიო - 16:25, 21 Aug, 2014

2363

ანდერს ფოგ რასმუსენის აზრით, რუსეთის ქმედებებმა უკრაინაში ევროპასა და მსოფლიოში უსაფრთხოების საკითხში ახალი ვითარება შექმნა, რასაც NATO აუცილებლად გაითვალისწინებს მომავალი ღონისძიებების დაგეგმვისას.

"მეორე მსოფლიო ომის შემდეგ, პირველად ხდება, რომ ევროპული ქვეყანა სამხედრო ძალის გამოყენებით იერთებს მეორე ქვეყნის ნაწილს. NATO-ს რუსეთის მიმართ ნდობა დაეკარგა - მან დაარღვია ყველა შეთანხმება და პირობა, რომელიც საერთაშორისო საზოგადოებას მისცა," - აცხადებს რასმუსენი Bild-თან ინტერვიუში.

"NATO-მ უნდა გააძლიეროს საერთო თავდაცვითი სისტემები. ჩვენ უკვე დავიწყეთ საჰაერო პატრულირება ბალტიისპირეთში, გავაგზავნეთ გემები ბალტიისა და შავ ზღვებში, გავზარდეთ სამხედრო სწავლებების რიცხვი. მომავალ სამიტზე ჩვენ დავგეგმავთ ახალ ნაბიჯებს, რათა მსგავს სიტუაციებში რეაგირება უფრო ეფექტურად და სწრაფად მოვახდინოთ," - აღნიშნავს გენერალური მდივანი.

რასმუსენი ასევე არ გამორიცხავს რუსეთის ღია აგრესიას უკრაინაში, რაც გამომდინარეობს იმ ფაქტებიდან, რომ მიუხედავად მსოფლიოს მძაფრი რეაქციისა, რუსეთი კვლავ აძლიერებს სამხედრო კონტინგენტს უკრაინის საზღვრებთან, შეყავს ბოევიკები და მძიმე სამხედრო ტექნიკა ტერორისტების დასახმარებლად, რაც იმას ნიშნავს, რომ რუსეთი თავის გეგმებში იტოვებს ღია ჩარევას უკრაინის საქმეებში.

რასმუსენმა ასევე აღნიშნა, რომ აუცილებელია უკრაინას ქმედითი დახმარება გაეწიოს - ევროკავშირი და მსოფლიოს წამყვანი ქვეყნები მას ეკონომიკის აღორძინებაში უნდა დაეხმარონ, ხოლო NATO აპირებს სამხედრო აღმშენებლობაში დახმარებას.