სართიჭალაში მომხდარ ავარიას 24 წლის გოგონას სიცოცხლე ემსხვერპლა

სამართალი - 15:55, 20 Aug, 2014

4832

სოფელ სართიჭალაში მომხდარ ავარიას 24 წლის გოგონას სიცოცხლე ემსხვერპლა. როგორც ირკვევა მძიმედ დაშავდა გარდაცვლილის 10 თვის ბავშვი, სხეულის დაზიანებები მიიღეს ასევე გარდაცვლილის მშობლებმა, მეუღლემ და 4 წლის შვილმა.

აღნიშნული ფაქტი „ნიუპოსტს“ შინაგან საქმეთა სამინისტროში დაუდასტურეს. როგორც უწყებაში აცხადებენ, საქმე აღძრულია 276-ე მუხლის პირველი და მე-5 ნაწილით. რაც ტრანსპორტის მოძრაობის უსაფრთხოების ან ექსპლუატაციის წესის დარღვევას ითვალისწინებს, რამაც ადამიანის სიცოცხლის მოსპობა გამოიწვია.

როგორც გარდაცვლილის მამიდამ „კახეთის საინფორმაციო ცენტრს“ განუცხადა, ავარია ე.წ. მარშუტკის და „ოპელის“ მარკის ავტომობილის შეჯახებამ გამოიწვია.

„თბილისში მიდიოდნენ ჩემი ძმის მარშუტკით, დაახლოებით 60 კმ/საათში სიჩქარით, რადგან 2 ბავშვი ეჯდათ. სართიჭალაში, მეორეხარისხოვანი გზიდან „ოპელმა“ მიუშვა ისე, რომ არც კი დაუმუხრუჭებია და ქვეშ შეუვარდა ჩემი ძმის მანქანას. მიკროავტობუსი რამდენჯერმე ამოტრიალდა, ყველანი ფანჯრებიდან გადმოცვივდნენ. ჩემი 24 წლის ძმისშვილი დაიღუპა, 10 თვის შვილის გადარჩენა კი შეძლო. ყველანი საავადმყოფოში გადაიყვანეს. ამ დროისთვის ყველა გამოწერეს, მაგრამ 10 თვის ბავშვის მდგომარეობა საშუალო სიმძიმისაა, რეანიმაციაში ჰყავთ, თავის ძვალი აქვს გატეხილი“, - განუცხადა გარდაცვლილის მამიდამ.