ევროკავშირი: ვითარებიდან გამომდინარე, მზად ვართ ახალი სანქციები განვიხილოთ

მსოფლიო - 22:07, 15 Aug, 2014

1172

"ნებისმიერი ცალმხრივი სამხედრო ქმედება განხორციელებული რუსეთის ფედერაციის მიერ უკრაინაში, ნებისმიერი საბაბით, მათ შორის ჰუმანიტარულით, ევროკავშირის მიერ ჩაითვლება საერთაშორისო სამართლის უხეშ დარღვევად," - ამის შესახებ ნათქვამია დასკვნაში, რომელიც მიიღეს ევროკავშირის ქვეყნების საგარეო საქმეთა მინისტრებმა საგანგებო სხდომაზე, უკრაინის საკითხის განხილვის შემდეგ.

ევროკავშირი მოუწოდებს რუსეთს, დაუყოვნებლივ ბოლო მოეღოს პროვოკაციებს უკრაინის საზღვართან. მოხდეს ტერორისტთა შეიარაღების ნაკადის შეჩერება, სამხედრო მრჩევლებისა და ბოევიკების შეყვანა კონფლიქტის რეგიონში და გაიყვანოს თავისი ძალები უკრაინის საზღვარის სიახლოვიდან.

ევროკავშირი რუსეთს ახალი სანქციების შესახებ აფრთხილებს: "ჩვენ მზად ვართ შემდგომი ქმედებებისთვის, რაც დამოკიდებულია უკრაინაში სიტუაციის განვითარებაზე და მზად ვართ განვიხილოთ დამატებითი სანქციები".

მინისტრთა საბჭო აღნიშნავს, რომ ამავე მოტივით, შემაკავებელი ზომები რუსეთის ფედერაციის წინააღმდეგ ძალაში რჩება.

"საბჭო კვლავაც აღნიშნავს, რომ ევროკავშირის მიერ მიღებული შემაკავებელი ზომები პირდაპირ არის დაკავშირებული რუსეთის ფედერაციის მიერ საერთაშორისო სამართლის დარღვევასთან, ყირიმის უკანონო ანექსიასა და უკრაინაში დესტაბილიზაციის ხელშეწყობასთან," - ნათქვამია დასკვნაში.

"მინისტრთა საბჭო, ევროკომისიასთან და ევროკავშირის საგარეო საქმეთა და უსაფრთხოების პოლიტიკის საკითხებში უმაღლეს წარმომადგენელთან ერთად, მონაწილეობს მონიტორინგისა და შეფასების პროცესში და მზად არის განიხილოს შემდგომი ქმედებები, რაც დამოკიდებულია სიტუაციაზე."

საბჭომ ასევე გამოთქვა იმედგაცრუება რუსეთის საპასუხო ნაბიჯებზე - გარკვეული სოფლის მეურნეობის პროდუქციის იმპორტის აკრძალვაზე ევროპიდან.

როგორც დასკვნაში ნათქვამია, რუსეთის ამ ქმედებებს საბჭო შეაფასებს სექტემბრის დასაწყისში, საგანგებო შეხვედრაზე.

დასკვნაში ასევე აღნიშნულია, - "საბჭო იმედის გამოთქვამს, რომ სხვა ქვეყნები თავს შეიკავებენ გამოიყენონ არსებული ვითარება და გადადგან ნაბიჯები, რომელიც მიზნად ისახავს ახალი სავაჭრო შესაძლებლობების ათვისებას, რომელიც წარმოიშვა რუსული ემბარგოს შედეგად."

გარდა ამისა საგარეო საქმეთა მინიტრები აღნიშნავენ, რომ რუსეთის ეკონომიკური სანქციები უკრაინის წინააღმდეგ აბსოლუტურად უსამართლოა და "ძირს უთხრის სამმხრივი მოლაპარაკებების პროცესს, რომელსაც ითვალისწინებს ასოცირების შესახებ შეთანხმება ევროკავშირსა და უკრაინას შორის".

საბჭომ ასევე გააფრთხილა რუსეთი თავი შეიკავოს ამგვარი ზომების განხორციელებისაგან აღმოსავლეთ პარტნიორობის სხვა ქვეყნების მიმართ, რომლებმაც ასევე ხელი მოაწერეს ევროკავშირთან ასოცირების ხელშეკრულებას და მოუწოდა კომისიის მხარი დაუჭიროს ამ ქვეყნებს საჭიროების შემთხვევაში.