სდსს-ის ყოფილი უფროსი თემურ ჯანაშია მიიჩნევს, რომ მას კანონსაწინააღმდეგო არაფერი ჩაუდენია. ამის შესახებ ჯანაშიამ მთავარ პროკურატურასთან განაცხადა.

„კანონსაწინააღმდეგო არაფერი გამიკეთებია არც მე, არც ჩემს წინამორბედს და არც იმ ადამიანს ვინც ჩემს შემდეგ იყო სამსახურის უფროსი. ამ ხარჯებს ეწეოდა სახელმწიფო დაცვის სპეციალური სამსახური და თითოეული თეთრი კანონიერად არის დახარჯული“, - განაცხადა ჯანაშიამ.

რაც შეეხება კითხვას ელოდება თუ არა დაკავებას, ჯანაშია აცხადებს, რომ ყველაფერი მოსალოდნელია.

მიხეილ სააკაშვილის და თეიმურაზ ჯანაშიას მიმართ გამოძიება გრძელდება საქართველოს სისხლის სამართლის კოდექსის 182-ე მუხლის მე-3 ნაწილით, რაც სასჯელის სახედ და ზომად ითვალისწინებს თავისუფლების აღკვეთას 7-დან 11 წლამდე ვადით.

ნინი კაციტაძე