კუდ-ის ყოფილი ხელმძღვანელის დათა ახალაიას ადვოკატის ირაკლი ზაქარეიშვილის ინფორმაციით, ოლეგ მელნიკოვმა ყოფილი მაღალჩინოსნების წინააღმდეგ ცრუ ჩვენება პროკურორების ზეწოლის შედეგად მისცა.

მისი თქმით, პროკურორები ამ ჩვენების სანაცვლოდ მელნიკოვს სასჯელის შემცირებას დაჰპირდნენ.

„ამ ჩვენებას თავდაყირა არაფერი არ დაუყენებია. მელნიკოვმა ცრუ ჩვენება მისცა. მელნიკოვის მიმართ საქართველოს პროკურატურა ახორციელებდა უპრეცედენტო ზეწოლას და საბოლოოდ მცირე სასჯელის დაპირებით დაიყოლიეს, რომ მიეცა ცრუ ჩვენება. მელნიკოვთან ციხეში შედიოდნენ პროკურორები და ჰქონდათ სხვადასხვა სახის დაპირებები და როგორც ჩანს ამ მცირე სასჯელის დაპირებამ შედეგი გამოიღო“, - განაცხადა ზაქარეიშვილმა.

სანდრო გირგვლიანის საქმეზე ოლეგ მელნიკოვი ყველა ეპიზოდში თავს დამნაშავედ ცნობს.მისი თქმით, წლების წინ ჩვენება დათა ახალაიამ დაუწერა, ახლა კი რეალობას აღწერს. მელნიკოვმა ყოფილი მაღალჩინოსნების ბრალეულობაზე ისაუბრა. მან ხელი დაადო სოსო თოფურიძეს, დათა ახალაიას და გია ალანიას.

მისი თქმით, მკვლელობის გამო საზოგადოებაში გამოწვეული აგრესიის ჩასახშობად მაშინდელმა ხელისუფლებამ გეგმა შეიმუშავა. გეგმა მდგომარეობდა შემდეგში, რომ დაეკავებინათ ოთხი მაღალჩინოსანი და წაეყენებინათ ბრალი. თუმცა მელნიკოვის თქმით, იყო დაპირება, რომ ისინი მალევე გათავისუფლდებოდნენ. მელნიკოვის ინფორმაციით, ეს პირობა მიხეილ სააკაშვილმა და ზურაბ ადეიშვილმა გასცეს.

ნინი კაციტაძე