,,სსიპ შემოსავლების სამსახურის სახელით ვაცხადებთ, შემოსავლების სამსახურის, საბაჟო დეპარტამენტის თანამშრომლები და პირადი შემადგენლობა არჩევნების შემდეგ არ შეცვლილა, ისინი საკუთარ სამსახურეობრივ უფლებამოსილებას დღესაც ისე ახორციელებენ, როგორც ამას 2012 წლის პირველ ოქტომბრამდე აკეთებდნენ. შესაბამისად, ჩნდება კითხვა, როდის იყო პრეზიდენტი გულწრფელი, როდესაც ის უმაღლეს შეფასებას აძლევდა ქართველი მებაჟის საქმიანობას, თუ დღეს, როდესაც მებაჟეების მიერ ქრთამის აღების ფაქტებზე საუბრობს.

საქართველოს პრეზიდენტის ოფიციალურ ვებ-გვერდზე გამოქვეყნებულ განცხადებაში მებაჟეების მიერ მასობრივად ქრთამის აღების შესახებ ინფორმაცია აღარ იძებნება, თუმცა პრეზიდენტის სიტყვები დაცულია მისი განცხადების ამსახველ ვიდეოჩანაწერებსა და სააგენტოების მიერ გავრცელებულ ინფორმაციებში.

ჩვენ მზად ვართ, მივიღოთ, განვიხილოთ და კანონის სრული სიმკაცრით მოვახდინოთ რეაგირება ჩვენი თანამშრომლების მიერ ჩადენილ, დანაშაულის თითოეულ ფაქტზე, რისთვისაც ვთხოვთ საქართველოს პრეზიდენტს, წარმოგვიდგინოს მის ხელთ არსებული, დანაშაულის მამხილებელი ფაქტები. წინააღმდეგ შემთხვევაში, აღნიშნულ განცხადებას განვიხილავთ როგორც იაფფასიან, პოლიტიკურ დემაგოგიას და სახელმწიფო ინსტიტუტების დისკრედიტაციისკენ, ამ ინსტიტუტების თანამშრომლების ცილისწამებისკენ მიმართულ ქმედებას”, - ნათქვამია განცხადებაში.