საინიციატივო ჯგუფი საზოგადოებრივ მაუწყებელზე კონკურსის შეჩერებას ითხოვს

საზოგადოება - 16:12, 21 Dec, 2012

404

თუ ყოფილი გენერალური დირექტორის განცხადებას ვენდობით, "მართვის კრიზისთან" გვაქვს საქმე, მაგრამ არხის კრიზისულ მდგომარეობაზე პასუხისმგებლობას არ იღებს სამეურვეო საბჭო. არადა, გენერალური დირექტორი და სამეურვეო საბჭო ურთიერთვალდებული სუბიექტები არიან და ერთმანეთის გარეშე საეჭვოა, ეს კრიზისი შექმნილიყო. მეორეც, რატომ უნდა აირჩიოს ახალი გენერალური დირექტორი იმ სამეურვეო საბჭომ, რომლის მიმართაც უნდობლობის ისეთივე ხარისხია, როგორიც ყოფილ გენერალურ დირექტორს ჰქონდა. ან რა გარანტია არსებობს, რომ ახალი გენერალური დირექტორიც "მართვის კრიზისს" არ შექმნის და ამჟამინდელი სამეურვეო საბჭო ამ კრიზისის შესახებ ისევ 3 წლის შემდეგ არ შეიტყობს?! საზოგადოებრივ მაუწყებელში შექმნილი კრიზისული მდგომარეობიდან გამომდინარე, აუცილებელ და საჭირო მოთხოვნად მიგვაჩნია, შეჩერდეს მაუწყებლის გენერალური დირექტორის ვაკანტური თანამდებობის დასაკავებლად მიმდინარე კონკურსი; პარალელურად საქართველოს პარლამენტმა საზოგადოებრივი მაუწყებლის სამეურვეო საბჭოს თავმჯდომარეს ლევან გახელაძეს მოსთხოვოს რიგგარეშე ანგარიშის ჩაბარება საზოგადოების წინაშე. ვფიქრობთ, ამ ანგარიშით მაინც შევიტყობთ იმ რეალობას, რომელმაც "მართვის კრიზისი" შექმნა. "საზოგადოებრივი მაუწყებლის შესახებ" კანონში ნათლად წერია, რომ საზოგადოებრივი მაუწყებელი უნდა იყოს პოლიტიკური და კომერციული გავლენისგან თავისუფალი, საზოგადოებრივი ინტერესების შესაბამისი არხი. მიგვაჩნია, რომ გახელაძის ანგარიშის შემდეგ უნდა შეიქმნას კრიზისის მართვის დროებითი ჯგუფი (თუნდაც 3 თვით), ამასობაში კანონში შევიდეს ცვლილებები, განახლდეს სამეურვეო საბჭო, რომელიც ყოველგვარი პოლიტიკური და კომერციული ვალდებულებებისგან იქნება თავისუფალი და მხოლოდ ასეთმა საბჭომ აირჩიოს გენერალური დირექტორი, რომელსაც მარტო ჩV-ს კი არა, არამედ გააზრებულ კონცეფციას მოსთხოვს. გენერალური დირექტორობის კანდიდატებისთვის ძირითადი მოთხოვნა უნდა იყოს ის, რომ თავად იყოს თავისუფალი პოლიტიკური და კომერციული გავლენისაგან, ანუ არც პარტიული ვალდებულება გააჩნდეს და არც კომერციული. წინააღმდეგ შემთხვევაში საზოგადოებრივი მაუწყებელი საზოგადოებას უფრო მეტად დაშორდება", - აღნიშნულია საინიციატივო ჯგუფის მიმართვაში, რომელსაც არხის გენერალური პროდიუსერი დოდო შონავა, ჟურნალისტი ქეთევან სადღობელაშვილი, მარკეტინგის სამსახურის უფროსი დავით არველაძე, პრომოუშენის სამსახურის უფროსი თორნიკე კაციტაძე და პროდიუსერი მაკა ასათიანი აწერენ ხელს.