ტელეკომპანია „მაესტროს“ გადამღებმა ჯგუფმა ხუთ საათიანი დაკავების შემდეგ საქართველო-აზერბაიჯანის საზღვარი გადმოკვეთა. აზერბაიჯანის შინაგან საქმეთა სამინისტრომ ჟურნალისტი ლევან ჩხაიძე და ოპერატორი ბექა ფარჯიანი ყარაბაღთან ახლოს, აღდამის რაიონთან დააკავა.

„ჩვენ ვცდილობდით მივახლოვებოდით აღდამის რაიონს, სადაც მოვლენების ეპიცენტრია და ამ ადგილიდან რამდენიმე წუთის სავალზე პოლიციამ დაგვაკავა. გვითხრეს, რომ გზა ჩაკეტილი იყო და მოგვთხოვეს სპეციალური ნებართვა, რომელიც ჩვენ არ გვქონდა და ამის თაობაზე ჩვენ საქმის კურსში არ ვიყავით. პოლიციელებმა გვითხრეს, რომ უნდა წავსულიყავით განყოფილებაში, რადგან არ გვქონდა აღნიშნული ნებართვა. მათ ვუთხრარით, რომ ჩვენი ამოცანა ადგილზე სიტუაციის დაფიქსირება იყო და პოლიციაში მას შემდეგ გავყვებოდით, რაც ადგილობრივ მოსახლეობას ჩავწერდით. თუმცა ამის ნებართვა არ მოგვცეს. განყოფილებაში გვითხრეს, რომ არ ვიყავით დაკავებული, მოხდებოდა იდენტიფიცირება და შემდეგ გავვათავისუფლებდნენ. ერთი საათის შემდეგ გადაწყვეტილება შეცვალეს, ჩამოგვართვეს საბუთები და ტელეფონი და გვითხრეს, რომ უნდა წავსულიყავით აზერბაიჯანის შინაგან საქმეთა სამინისტროს ორგანიზებულ დანაშაულეთან ბრძოლის განყოფილებაში, სადაც ჩვენი დაკითხვა მოხდებოდა. როდესაც ბაქოში მივდიოდით, ისევ შეცვალეს გადაწყვეტილება და წამოგვიყვანეს წითელი ხიდის სასაზღვრო გამშვები პუნქტის მიმართულებით. ვიკითხეთ, რომ ხომ არ იყო ეს დეპორტი, მაგრამ მათ გვითრეს, რომ ეს არ იყო დეპორტი. ჩვენ ვითხოვდით, რომ ბაქოში გავეშვით, მაგრამ გვითხრეს, რომ გადაწყვეტილება ხელმძღვანელობამ მიიღო, თუმცა ვინ იგულისხმეს ხელმძღვანელობაში, ეს არ გაგვიმხილეს“, - განაცხადა ტელეკომპანია „მაესტროს“ ეთერში ჩართვისას ლევან ჩხაიძემ.

„მაესტროს“ გადამღები ჯგუფი აღდამის რაიონში სიტუაციის დასაფიქსირებლად ჩავიდა. როგორც ადგილობრივები ამბობენ, აღდამის რაიონში ყოველ ღამით სროლის ხმა ისმის. მათი ინფორმაციით, ქალები და ბავშვები რამდენიმე დღეა სოფლიდან გაყვანილი არიან. როგორც ცნობილია, ამის მიზეზი გახდა ის, რომ სნაიპერები საცხოვრებელი სახლების მიმართულებით ისვრიან. აზერბაიჯანში დიდი მოლოდიანია 8 აგვისტოს სოჭში დაგეგმილი მოლაპარაკებისა, სადაც აზერბაიჯანის და სომხეთის პრეზიდენტები ხვდებიან. ადგილობრივები იმედოვნებენ, რომ კონფლიქტი ფართომასშტაბიან არეულობაში არ გადაიზრდება.