რუსული მედიაცენზურა BBC-ის რუსულ რედაქციას დაბლოკვით ემუქრება

მსოფლიო - 19:45, 05 Aug, 2014

2004

4 აგვისტოს გავრცელდა ინფორმაცია, რომ "როსკომნადზორმა" - რუსეთის სახელმწიფოს ინფორმაციის გავრცელებისა და კომუნიკაციების ზედამხედველობის სამსახურმა, BBC-ის რუსული რედაქციის სტატია "მოძრაობა ციმბირის ფედერალიზაციის მოთხოვნით" შავ სიაში შეიტანა,

დღეს, 5 აგვისტოს BBC-ის რუსულ რედაქციაში რუსეთის სახელმწიფოს ინფორმაციის გავრცელებისა და კომუნიკაციების ზედამხედველობის სამსახურის ახალი წერილი მოვიდა, რომელშიც რუსი ცენზორები BBC-სგან მოითხოვენ საერთოდ წაშალონ აღნიშნული სტატია საიტიდან, წინააღმდეგ შემთხვევაში, ისინი იმუქრებიან, რომ რუსეთში აღნიშნული ვებ-პორტალი საერთოდ დაიბლოკება.

"თუ BBC-ის რუსული რედაქცია, სხვა რუსული მედიასაშუალებებისგან განსხვავებით, არ შეწყვეტს დესტრუქციული მასალის გამოქვეყნებას, ჩვენ იძულებული გავხდებით, დავბლოკოთ ეს ინტერნეტრესურსი რუსეთში," - ნათქვამია წერილში.

მუქარის საპასუხოდ, BBC რუსული რედაქცია აცხადებს, რომ არ უღალატებს ინფორმაციის თავისუფლებისა და რედაქციის პრინციპების მოთხოვნებს.

"BBC მიუკერძოებლად ავრცელებს ყველა ინფორმაციას და თანაბარ საშუალებას აძლევს ყველა მხარეს თავისი პოზიციების გამოხტვისთვის," - აცხადებენ სააგენტოში.