საქართველოს შინაგან საქმეთა ყოფილ მინისტრს ვანო მერაბიშვილს ბრალი ოფიციალურად სასჯელაღსრულების ნომერ მეცხრე დაწესებულებაში, ე.წ. მატროსოვის ციხეში წაუყენეს. პროკურორის ინფორმაციით, მერაბიშვილმა ბრალდების გაცნობაზე და დადგენილების ჩაბარებაზე უარი განაცხადა.

“ბრალდებულმა ივანე მერაბიშვილმა, მას შემდეგ რაც შეიტყო, რომ მის მიმართ ბრალდების შესახებ დადგენილება იქნა გამოტანილი, მის გაცნობაზე და ბრალდების დადგენილების ჩაბარებაზე უარი განაცხადა. ირაკლი ოქრუაშვილი იმ დროს ერთ-ერთი უმაღლესი პოლიტიკური თანამდებობის პირი იყო. მასთან უშუალო შეხება ჰქონდათ, როგორც ივანე მერაბიშვილს, ასევე მიხეილ სააკაშვილს და ასევე სხვა თანამდებობის პირებს. იგი ერთ-ერთი მოწმეა, რომელიც ბრალდებულების მამხილებელ პირდაპირ ჩვენებას იძლევა”, – განაცხადა პროკურორმა დავით ბაინდურაშვილმა.

მერაბიშვილისა და სააკაშვილის ადვოკატებმა საქმეში მტკიცებულებების არარსებობაზე გაამახვილეს ყურადღება და აღნიშნეს, რომ პროკურატურას მათი დაცვის ქვეშ მყოფის საქმეში “სტაბილური” მოწმეები ჰყავს.

“მე მათ დავარქვი “სტაბილურები”, იმის გამო, რომ პროკურატურა ვანო მერაბიშვილთან მიმართებაში, ბოლო 6 ბრალდების საქმეში ერთსა და იმავე მოწმეებს იყენებს. ესენი არიან ბურჯანაძე, ირაკლი ოქრუაშვილი. ბურჯანაძე როდესაც იმ პერიოდში გამოდიოდა და ამბობდა, არ შეიძლება ასეთი განცხადებების კეთება, რომ ვალერი გელაშვილის მიმართ განხორციელებული უკანონო ქმედებები ხელისუფლებას დაბრალდესო, დღეს კი ვხედავთ, რომ ის განსაკუთრებული ინფორმაციის მატარებელი იყო”, – განაცხადა მერაბიშვილის ადვოკატმა გიორგი ჩივიაშვილი.