მთავარმა პროკურატურამ ჯერ მიხეილ სააკაშვილის ბრალდების დადგენილება გამოიტანა და შემდეგ დაიწყო, საქმის ერთადერთი მთავარი მოწმის, ნინო ბურჯანაძის დაკითხვა. ამის შესახებ საქართელოს ექს-პრეზიდენტის ადვოკატმა ოთო კახიძემ განაცხადა.

მისი თქმით, აღნიშნული ფაქტი მიუთითებს, რომ პროკურატურამ ფორსირებულ რეჟიმში დაწერა დადგენილება და შემდგომ დაიწყო მტკიცებულებების "შექმნა".

„ბრალდების შესახებ დადგენილება, გამოტანილია საქართველოს მთავარი პროკურორის, გიორგი ბადაშვილის მიერ 28 ივლისს, 13:00 საათზე. დადგენილება კი რაზეც ეყრდნობა, ვგულისხმობ ერთადერთ მტკიცებულებას საქმეში - ნინო ბურჯანაძის ჩვენებას, აღნიშნული ჩვენება არის მიღებული 28 ივლისს, 17:10 საათზე.

ანუ პროკურატურამ ჯერ გამოიტანა ბრალდების დადგენილება მიხეილ სააკაშვილის მიმართ მტკიცებულებების გარეშე და ბრალის შემდგომ, 15:45 საათზე დაიწყო ნინო ბურჯანაძის დაკითხვა და აღნიშნული დაკითხვა დასრულდა 17:10 საათზე.

ეს ნიშნავს, რომ ივანიშვილის დავალებით, პროკურატურამ ფორსირებულ რეჟიმში დაწერა დადგენილება და შემდგომ დაიწყო მტკიცებულებების "შექმნა"“, - აცხადებს კახიძე.

ნინო დათაშვილი