რუსეთის პრეზიდენტი ვლადიმერ პუტინი რუსეთის მოსახლეობას საკუთარ თავს როგორც პატრიოტს, ისე წარმოაჩენს. თუმცა, იგი რეალურად მსოფლიო საზოგადოებრიობის, მეზობელი ქვეყნებისა და თავად რუსეთის მოსახლეობისათვის უდიდეს საფრთხეს წარმოადგენს. ამის შესახებ წერს ჟურნალი The Economist, რომელიც თვლის, რომ რუსეთის მოსახლეობა პუტინის მიერ წარმოებული ანტიდასავლური პროპაგანდის მსხვერპლია.

მართალია, ბევრს მსოფლიოში, ანგარების ანდა თვითმოტყუების გამო, არ სურს დაინახოს ვლადიმერ პუტინის რეალური სახე, მაგრამ ფაქტია, რუსეთის პრეზიდენტი საშიშროებას წარმოადგენს და თუ მსოფლიო ამას წინ არ აღუდგება, წინ უარესი მევლენები გველის, - წერს ჟურნალი.

"მისტერ პუტინი საკუთარი ტყუილის ქსელში გაება - როდესაც მისმა ხელქვეითებმა შექმნეს მითი "კიეველ ფაშისტებზე" და სამი წლის ბიჭუნას "ჯვარცმაზე", რუსი ობივატელის თვალში პუტინის რეიტინგი 30%-ით გაიზარდა. და 80-ს გადააჭარბა. საკუთარი ხალხის სიცრუის მეშვეობით "გამოღვიძების" შემდეგ "მეფეს" აღარ შეუძლია ტყუილიდან თავის დაღწევა, იგი ვეღარ განაცხადებს, რომ მაგალითად, უკრაინის ხელისუფლება არც ისე ცუდია. ვერც იმ სიტყვებს წაიღებს უკან, რომ "დასავლეთი მტერია, რომელსაც რუსეთის განადგურება სურს. ასე რომ, შინ ნათქვამი ტყუილი განაპირობებს მის ზღვარგადასულ მოქმედებებს საზღვრებს გარეთ," - წერს The Economist.

გამოცემა თვლის, რომ პუტინი პირდაპირ კავშირშია მალაიზიური თვითმფრინავის ჩამოგდებასთან.

"თვითგამოცხადებული ე.წ. დონეცკის სახალხო რესპუბლიკის ბირთვს წარმოადგენენ არა სეპარატისტები, არამედ რუსეთის მოქალაქეები, რომლებიც არიან ან იყვნენ რუსული სპეცსამსახურების წევრები. მათმა ყოფილმა კოლეგა პუტინმა დააფინანსა ომი, შეაიარაღა ისინი ტანკებით, არტილერიით, და "დედამიწა-გაერი" ტიპის რაკეტებით. სასხლეტს თითი სეპარატისტებმა გამოჰკრეს, მაგრამ ძაფი პუტინმა გამოქაჩა," - წერს The Economist.