თბილისის ყოფილი მერის გიგი უგულავას ინფორმაციით, მთავრობა ჯოზეფ ქეის მის წინააღმდეგ ჩვენების მიცემის სანაცვლოდ, რუსთავის მეტალურგიულ ქარხანას შეჰპირდა. ამის შესახებ უგულავამ სასამართლო პროცესზე განაცხადა, სადაც “ტელეიმედისა” და რიყის გასხვისების საქმეზე ჯოზეფ ქეი „სკაიპის“ მეშვეობით დაიკითხა.

„ჯეოზეფ ქეის შეჰპირდა საქართველოს მთავრობა, რომ ამ ცრუ ჩვენების სანაცვლოდ ის მიიღებს რუსთავის მეტალურგიულ ქარხანას, რომელიც ეკუთვნის პატარკაციშვილების ოჯახს. პრაქტიკულად, მიღებულია გადაწყვეტილება, რომ უზენაეს სასამართლოში ჯოზეფ ქეი გაიმარჯვებს. თუმცა, ჩემს მიერ რამდენიმე დღის წინ გაკეთებული განცხადების გამო, მოხდა ამის შეყოვნება. სავარაუდოდ, ამ ჩვენებაზე დაყრდნობით, რომელიც გახლავთ ცრუ, ეს გადაწყვეტილება შევა ძალაში. ეს არსება არის ცრუ მოწმე, რომელიც საფასურად იღებს მეტალურგიულ ქარხანას. ხელისუფლება ისე დაბნელებულია ამ ბოღმით, რომ არ ადარდებს იმ ადამიანების სიდუხჭირე, ვინც ამ ქარხანაში მუშაობს“, - განაცხადა უგულავამ.

საქალაქო სასამართლოში “ტელეიმედისა” და რიყის გასხვისების საქმეზე პროცესი 14:00 საათზე დაიწყო.

ნინო დათაშვილი